Greqia i dorëzoi Bullgarisë eshtrat e carit bullgar Samuill

Sat, 03 Oct 2026 12:19:04 GMT

Bullgarët pritën mbetjet mortore të një prej sundimtarëve më të njohur të Bullgarisë Mesjetare, carit Samuil. Më shumë se një mijë vjet pas vdekjes së tij në Prespë, eshtrat iu dorëzuan shtetit bullgar gjatë një ceremonie zyrtare në Muzeun e Kulturës Bizantine në Selanik. Ceremonia u zhvillua me pjesëmarrjen e kryeministrit të Greqisë, Kyriakos Mitsotakis, dhe kryeministrit të Bullgarisë, Rumen Radev. Së bashku me eshtrat e carit Samuil u dorëzuan edhe mbetje njerëzore të zbuluara në dy sarkofagë të tjerë në bazilikën në ishullin e Shën Ahilit. Sipas vlerësimeve, ato i përkasin carit Gavril-Radomir dhe anëtarëve të tjerë të familjes mbretërore. Procesverbalet e dorëzim-pranimit të eshtrave u nënshkruan nga ministri bullgar i kulturës, Evtim Milloshev, dhe homologja e tij greke, Lina Mendoni, në prani të kryeministrave të Bullgarisë dhe Greqisë.

Sofja dhe Athina ranë dakord për kthimin e ndërsjellë të relikteve historike

QSL nr. 10: Viti 1950 – Krijimi i “Fondit të Artë” të BNR-së

Sat, 03 Oct 2026 08:43:41 GMT

Në vitin 2026, Radio Bullgaria konfirmon raportet e radioamatorëve me një seri të re prej 12 kartolinash QSL. Imazhi i secilës prej tyre vë në qendër një ngjarje të caktuar historike, të lidhur me historinë e Radios Kombëtare Bullgare (BNR) dhe programit "Radio Bullgaria", i cili feston 90-vjetorin e tij. Në fillim të çdo muaji, në një publikim të veçantë, mund të mësoni fakte interesante që lidhen me imazhet e këtyre kartolinave.

Kartolina e dhjetë QSL për vitin 2026 i kushtohet themelimit të “Fondit të Artë” të Radios Kombëtare Bullgare (BNR)

Ideja për të ruajtur regjistrime të çmuara, të cilat do t’u mbeteshin brezave të ardhshëm, daton që nga drejtori i parë i Radios Kombëtare, Sirak Skitnik. Me nismën e tij, në vitin 1938 u blenë magnetofona posaçërisht për këtë qëllim. Në vitin 1950 u nxor urdhri për themelimin e “Fondit të Artë” të BNR-së, por ai filloi të funksionojë në mënyrë të sistemuar dhe në formën e tij të tanishme, si arkiv i specializuar, në nëntor të vitit 1957.

Zakoni “Surva” mori jetë në muret e një ndërtese gjashtëkatëshe në Pernik

Sat, 03 Oct 2026 08:10:09 GMT

Maska, brirë dhe kambana të rënda – një mural i ri monumental, i frymëzuar nga tradita e kukerëve dhe festivali ndërkombëtar “Surva” në Pernik, e ka shndërruar fasadën e një ndërtese gjashtëkatëshe në një lloj skene për një nga zakonet popullore më të njohura bullgare.

Projekti mbresëlënës “GHOSTBUSTERS” (“Gjuetarët e fantazmave”) shtrihet në dy mure me përmasa të përbashkëta 18 me 15 metra. Autorë janë artistët vizualë të Fine Graff Art Studio, misioni i të cilëve është të zhvillojnë artin modern në Bullgari, duke e bërë atë pjesë të mjedisit urban dhe një hapësirë takimi me tema të rëndësishme kulturore dhe histori vendase.

Hyrje falas në Muzeun Kombëtar Etnografik çdo fundjavë gjatë tetorit

Sat, 03 Oct 2026 07:05:00 GMT

Për shkak të interesimit të madh dhe reagimeve pozitive ndaj nismës së Institutit të Etnologjisë dhe Folkloristikës me Muze Etnografik pranë Akademisë Bullgare të Shkencave – “120 vjet – 120 minuta në MKE”, ajo është zgjatur për të tretin muaj radhazi dhe do të vijojë edhe gjatë tetorit. Sallat e ekspozitave të Muzeut Kombëtar Etnografik do të vazhdojnë të jenë me hyrje falas çdo të shtunë dhe të diel gjatë tetorit 2026, nga ora 10:00 deri në 12:00.

Muzeu Kombëtar Etnografik e ka zanafillën që në vitin 1892. Ai ndodhet në godinën e Pallatit Mbretëror, në zemër të Sofjes, dhe gjatë dekadave ka grumbulluar ekspozitën etnografike më përfaqësuese në vend.

Atmosfera e muzeut është unike dhe u jep mundësi të gjithë të interesuarve të njohin traditat, zakonet dhe mënyrën e jetesës së bullgarëve nga periudha dhe rajone të ndryshme, si dhe të njihen nga afër me thesaret e etnografisë bullgare.

Përpiloi: Cvetana Tonçeva

Përgatiti në shqip: Kostandina Bello

Ngjarjet me adresë ballkanike

Sat, 03 Oct 2026 06:00:01 GMT

Rumania në kërkim të kryeministrit të katërt pas dështimit të qeverisë së propozuar nga Mureșan

Rumania mbetet pa një qeveri të rregullt, pasi parlamenti rrëzoi qeverinë e propozuar nga liberali Siegfried Mureșan, e cila mori 182 vota pro, ndërsa nevojiteshin 233. Presidenti Nicușor Dan do të zhvillojë të hënën konsultime të reja për kandidaturën e katërt për postin e kryeministrit, raportoi Radio Romania International.

Kriza politike në vend vazhdon prej gati pesë muajsh. Qeveria e Ilie Bolojan ra pas një mocioni mosbesimi në maj, por vazhdon të qeverisë si kabinet në detyrë. Kandidati i parë, Eugen Tomac, u tërhoq pasi nuk arriti të siguronte mbështetjen e nevojshme, ndërsa qeveria e propozuar nga liberali Adrian Veștea u rrëzua nga parlamenti.

Pas dy qeverive të propozuara të rrëzuara dhe më shumë se 60 ditësh nga kërkesa e parë për mocion mosbesimi, Kushtetuta i lejon presidentit të shpërndajë parlamentin dhe të shpallë zgjedhje të parakohshme. Megjithatë, Dan e kundërshton një skenar të tillë, i cili sipas tij do të thellonte paqëndrueshmërinë dhe do të vononte korrigjimet urgjente të nevojshme në buxhet.

Bullgaria në pritje të kthimit historik të eshtrave të carit Samuill

Sat, 03 Oct 2026 04:50:44 GMT

Më shumë se një mijë vjet pas vdekjes së tij, cari Samuill (997-1014) po kthehet në atdhe, në Bullgari, lirisë dhe pavarësisë së së cilës ai ia kushtoi jetën. Eshtrat e njërit prej sundimtarëve më të shquar mesjetarë të Bullgarisë do t’i dorëzohen sot shtetit bullgar gjatë një ceremonie zyrtare në Muzeun e Kulturës Bizantine në Selanik, në prani të kryeministrit Rumen Radev dhe kryeministrit grek Kiriakos Mitsotakis, njofton shërbimi për shtyp i qeverisë.

Më vonë, Bullgaria do t’i presë eshtrat e carit të saj me një ceremoni shtetërore në sheshin “Knjaz Aleksandër I” në Sofje.

Pas hyrjes në hapësirën ajrore bullgare, avioni ushtarak transportues “Spartan”, që transporton eshtrat e carit Samuill do të shoqërohet nga dy çifte avionësh luftarakë MiG-29 dhe F-16. Formacioni do të fluturojë mbi sheshin “Knjaz Aleksandër I” rreth orës 12:30. Avionët luftarakë do të kryejnë një fluturim të dytë mbi shesh pas uljes së avionit transportues “Spartan”.

Nga aeroporti “Vasill Levski” në Sofje deri në sheshin “Knjaz Aleksandër I”, eshtrat e carit Samuill do të transportohen nga Ushtria Bullgare.

Perëndimi dhe agimi i ringjallur i carit bullgar Samuill

Redaktoi: Miglena Ivanova

Përgatiti në shqip: Vesella Mançeva

Perëndimi dhe agimi i ringjallur i carit bullgar Samuill

Sat, 03 Oct 2026 03:47:04 GMT

Më 6 tetor 1014, në Prespë, vdiq një nga sundimtarët më të shquar të Bullgarisë mesjetare, cari Samuill. Komandant ushtarak që kaloi dekada të tëra në luftë kundër Bizantit dhe sundimtar, fati tragjik i të cilit shënoi fundin e Shtetit të Parë Bullgar. Jeta e tij përfundoi në mënyrë dramatike, por ai ruan një vend madhështor në kujtesën historike bullgare.

Si udhëheqës ushtarak dhe sundimtar, jeta e Samuilit në fund të shekullit X dhe në fillim të shekullit XI kaloi në luftë të pandërprerë për mbrojtjen e shtetit bullgar nga Bizanti.

Sipas burimeve bizantine, zemra e Samuilit nuk e përballoi pamjen e ushtrisë bullgare të verbuar nga perandori Vasili II.

“Duhet të themi se ajo fillon edhe para shfaqjes së tij dhe është ndoshta lufta më e gjatë bullgaro-bizantine në Ballkan. Ajo zgjat gjysmë shekulli, por për rreth 40 vjet prej saj pikërisht Samuili është ai që udhëheq si popullin, ashtu edhe ushtrinë dhe shtetin”, tregon për Radio Bullgarinë prof. Georgi Nikollov, pedagog i historisë mesjetare bullgare në Universitetin e Sofjes “Shën Klimenti i Ohrit”.

Në kërkim të zërit të përbashkët të kulturës bullgare në botë

Fri, 02 Oct 2026 19:42:24 GMT

Kultura bullgare prej kohësh nuk njeh kufij gjeografikë. Ajo udhëton bashkë me njerëzit – përmes gjuhës, këngës, librit, vallëzimit dhe festave. Por kur njerëzit janë të shpërndarë në vende të ndryshme të botës, shtrohet pyetja: si mund të takohen krijuesit, të komunikojnë me njëri-tjetrin, të shkëmbejnë përvoja dhe të bëhen më të dukshëm, edhe në vendin e tyre?

Përgjigjen do të përpiqet ta gjejë Shoqata e Organizatave Kulturore Bullgare Jashtë Vendit (ABKSHJ). Themelet e saj u hodhën më 29 korrik 2025, gjatë mbledhjes themeluese të zhvilluar në Qendrën Bibliotekare dhe të Informacionit të Agjencisë Ekzekutive për Bullgarët Jashtë Vendit, në Sofje. Një vit më vonë, shoqata tashmë ka fituar edhe regjistrimin zyrtar si person juridik, duke krijuar kështu mundësinë të veprojë si një organizatë përfaqësuese që bashkon organizatat kulturore bullgare jashtë vendit. Tani, detyra e vërtetë e Këshillit të saj Drejtues, me nëntë anëtarë, është të gjejë bashkëpunëtorë me të njëjtin vizion mes numrit të madh të krijuesve dhe organizatave kulturore bullgare në mbarë botën.

Si do ta bëjë këtë? Për këtë dhe për pyetjet e tjera që lidhen me veprimtarinë e ardhshme, iu drejtohemi kryetares së ABKSHJ-së, Vesella Rajçinova, e cila vetë është një njeri e përkushtuar ndaj kulturës dhe krijuese e festivalit ndërkombëtar “Shpirti bullgar në Tokën e Shenjtë”, në Izrael, i cili është shndërruar në një hapësirë takimi për bullgarët që jetojnë në vende të ndryshme të botës. Pikërisht komunikimi me ta e ka bindur Rajçinovën për nevojën e krijimit të një bashkimi më të qëndrueshëm të krijuesve. Në një intervistë për Radio Bullgarinë, ajo thotë se synimi i shoqatës së re është të shndërrohet në një platformë më të gjerë se shoqatat tradicionale.

Parashikimi i motit për fundjavën

Fri, 02 Oct 2026 19:26:10 GMT

Të shtunën, temperaturat minimale do të lëvizin nga 1°C në luginat deri në 13°C në juglindje. Në Sofje priten rreth 2°C. Paradite, në Bullgarinë Lindore do të ketë vranësira të dendura të ulëta dhe në disa zona edhe mjegull. Gjatë ditës do të mbizotërojë moti me diell, me vranësira të herëpashershme në juglindje. Në disa zona të malit Stranxhës mund të ketë reshje të shkurtra shiu. Era do të jetë mesatare, ndërsa në lindje të vendit do të fryjë e fortë nga lindja-verilindja. Temperaturat maksimale do të arrijnë nga 18 deri në 23°C, ndërsa në kryeqytet rreth 19°C.

Në bregdetin e Detit të Zi do të mbizotërojë moti me diell, me vranësira të përkohshme, më të dendura përgjatë bregdetit jugor. Kryesisht gjatë paradites priten reshje të shkurtra shiu në disa zona. Temperaturat e ajrit në bregdet do të jenë nga 18 deri në 20°C, ndërsa temperatura e ujit të detit do të jetë 20–21°C. Deti do të jetë i trazuar, me dallgë deri në 3–4 ballë.

Në zonat malore do të mbizotërojë moti me diell, me vranësira të përkohshme mbi vargmalet në pjesën juglindore të vendit. Në Stranxha, në disa zona do të ketë reshje të shkurtra shiu. Do të fryjë erë e fortë nga lindja-verilindja. Temperatura maksimale do të jetë rreth 12°C në lartësi 1200 metra dhe rreth 5°C në 2000 metra.

Të dielën, era do të dobësohet edhe në Bullgarinë Lindore dhe do të jetë e lehtë deri mesatare, kryesisht nga lindja-verilindja. Në pjesën tjetër të vendit do të jetë kryesisht e dobët, nga lindja-juglindja, ndërsa herë pas here do të pushojë plotësisht. Moti do të jetë kryesisht me diell. Temperaturat minimale në shumicën e zonave do të jenë 5–10°C, ndërsa në zonat e ulëta të rrethuara nga male në Bullgarinë Perëndimore dhe Qendrore do të jenë më të ulëta dhe mund të ketë ngrica. Temperaturat maksimale do të rriten.

Redaktoi: Ivo Ivanov

Përgatiti në shqip: Svetllana Dimitrova

RMV kërkon dialog me Bullgarinë për rrugën drejt BE-së

Fri, 02 Oct 2026 18:24:41 GMT

Kryeministri i Maqedonisë së Veriut, Hristijan Mickoski, ka marrë një këshillë nga kryetarja e Komisionit Evropian, Ursula von der Leyen, që gjatë takimit të ardhshëm më 7 dhe 8 tetor në Sofje për Korridorin Hekurudhor nr. 8, ku do të marrë pjesë edhe ministri i punëve të jashtme dhe tregtisë së jashtme i Maqedonisë së Veriut, Timço Mucunski, të kërkojë një takim me ministren e jashtme bullgare, Velisllava Petrova, në përpjekje për të “rikthyer rrugën e vendit drejt negociatave me BE-në”.

Sipas Mickoskit, menjëherë në Sofje është dërguar një notë zyrtare me kërkesë për një takim dypalësh, njofton BTA.

Në një konferencë të përbashkët për shtyp të Mickoskit dhe Ursula von der Leyenit, e cila ndodhet për vizitë në Shkup në kuadër të turneut të saj ballkanik, kryeministri i Maqedonisë së Veriut deklaroi se i ka kërkuar kryetares së Komisionit Evropian ndërmjetësimin e BE-së në bisedimet me Bullgarinë.

Sipas Von der Leyenit, një takim i mundshëm mes Mucunskit dhe Petrovës në Sofje do të ishte “hapi i parë drejt përpjekjes për të rifilluar procesin e integrimit evropian të Maqedonisë së Veriut”.

Lexoni më tepër në arkivin tonë:

Mickoski sugjeron pjesëmarrjen e BE-së në dialogun e RSM-së me Bullgarinë

Redaktoi: Miglena Ivanova

Përgatiti në shqip: Vesella Mançeva

Qeveria nuk do ta anulojë marrëveshjen me Ukrainën

Fri, 02 Oct 2026 17:48:22 GMT

Qeveria nuk do ta anulojë marrëveshjen për bashkëpunim ndërmjet Bullgarisë dhe Ukrainës, e cila u nënshkrua më 30 mars të këtij viti në Kiev nga kryeministri i përkohshëm Andrej Gjurov dhe presidenti ukrainas Volodimir Zelenski. Kjo u bë e qartë nga përgjigjja e kryeministrit Rumen Radev ndaj një pyetjeje të partisë “Vëzrazhdane” gjatë seancës së kontrollit parlamentar.

“Nuk kam thënë kurrë se do ta pezulloj marrëveshjen që kryeministri i përkohshëm Andrej Gjurov nënshkroi me Ukrainën. Kam thënë se ajo është një vendim jo racional dhe jo i mirë”, deklaroi kryeministri Radev.

Sipas tij, dokumenti parashikon vetëm shqyrtimin e mundësive për mbështetje, por nuk përmban angazhime për veprime konkrete. Radev hodhi poshtë pretendimet se kishte premtuar ndërprerjen e kësaj marrëveshjeje, njoftoi reporteri ynë Daniell Inkov.

Lexoni më tepër në arkivin e Radio Bullgarisë:

Redaktoi: Miglena Ivanova

Përgatiti në shqip: Vesella Mançeva

Sarkofagu për car Samuilin tashmë ndodhet në bazilikën “Shën Sofja”

Fri, 02 Oct 2026 16:31:48 GMT

Sarkofagu prej mermeri, në të cilin më 3 tetor do të vendosen eshtrat e car Samuilit, mbërriti paraditen në kryeqytet dhe u vendos në bazilikën “Shën Sofja”, njoftoi gazetarja Svetosllava Kuzmanova.

Sarkofagu është punuar në Velingrad (Bullgaria Jugore) dhe ka një gjatësi prej 2,3 metrash. Ai është pothuajse një metër i gjerë dhe 90 centimetra i lartë. Brenda tij do të vendoset një arkivol prej druri me eshtrat e sundimtarit bullgar.

Punimi i sarkofagut është miratuar nga Patriarku Daniill, ndërsa vendimi për pamjen e tij është marrë nga Mitropolia e Sofjes.

Fentanili po zë një pjesë gjithnjë e më të madhe të tregut të drogës në Sofje

Fri, 02 Oct 2026 15:08:41 GMT

Fentanili po e zëvendëson gjithnjë e më dukshëm heroinën në tregun e drogës në kryeqytetin bullgar. Këtë e deklaroi për reporterin tonë Nikollaj Hristov, Nikolla Shopov nga sektori i narkotikëve në Drejtorinë e Punëve të Brendshme të Sofjes.

“Që tani mund të themi se heroina në rrugët e Sofjes ose nuk ofrohet fare, ose është jashtëzakonisht e rrallë, pasi i gjithë tregu është pushtuar nga fentanili”, tha Shopov. Sipas tij, fentanili ka hyrë në kryeqytet katër deri në pesë vjet më parë, por gjatë një ose dy viteve të fundit prania e tij është bërë gjithnjë e më e dukshme.

Po sekuestrohen sasi gjithnjë e më të mëdha të kësaj substance, gjë që sipas Shopovit është shenjë e rritjes së konsumit. Megjithatë, drogat më të përhapura në Sofje mbeten marihuana, amfetamina dhe kokaina.

Shopov shtoi se një dozë e vetme fentanili në kryeqytet kushton rreth 10 euro, ndërsa çmimi i një grami varion nga 70 deri në 100 euro.

Lexoni më shumë në arkivin e Radio Bullgarisë:

Fentanili – një rrezik i ri në panoramën e ndryshueshme të opiateve në Bullgari

Redaktoi: Miglena Ivanova

Përgatiti në shqip: Vesella Mançeva

Bullgaria sot – 2 tetor 2026

Fri, 02 Oct 2026 15:00:49 GMT

Në këtë program më parë mund të dëgjoni lajmet e ditës.

Në rubrikën “Kryevepra të kulturës muzikore bullgare” do t’ju prezantojmë këngën “Ndalo, mos ik…” – një hit të Mitko Shterevit që mbijetoi filmin “Adaptimi”.

Në përmbyllje ju ofrojmë një valle popullore bullgare në ekzekutim të Orkestrës së Muzikës Popullore të Radios Kombëtare Bullgare.

Ju urojmë minuta të këndshme!

· 01.36 – Lajmet

· 12.51 – Kryevepra të kulturës muzikore bullgare

· 21.13 – Muzikë

KE miratoi ndihmën shtetërore bullgare prej 170 mln eurosh për fermerët

Fri, 02 Oct 2026 14:28:02 GMT

Bullgaria mori miratimin e Komisionit Evropian për skemën e ndihmës shtetërore “Mbështetje për fermerët e angazhuar në sektorin e prodhimit bujqësor primar në lidhje me krizën në Lindjen e Mesme”, e njohur si “ndihma iraniane”, njoftoi Ministria e Bujqësisë.

Masa u hartua në përputhje me Kornizën e Përkohshme për ndihmën shtetërore në lidhje me krizën në Lindjen e Mesme dhe u dërgua për notifikim në Komisionin Evropian më 1 shtator 2026.

Skema ka një buxhet prej 170 milionë eurosh dhe do të ofrojë mbështetje të pakthyeshme për një pjesë të kostove të rritura për naftën dhe plehrat kimike si pasojë e krizës në Lindjen e Mesme.

Ndihma maksimale arrin deri në 50 mijë euro për një ndërmarrje. Pagesat duhet të përfundojnë deri në fund të këtij viti.

Redaktoi: Miglena Ivanova

Përgatiti në shqip: Vesella Mançeva

Qeveria do ta mbajë deficitin e buxhetit në nivelin e planifikuar prej 5,7%

Fri, 02 Oct 2026 13:58:30 GMT

Deficiti i buxhetit për vitin 2026 pritet të jetë 5,7%, ashtu siç ishte planifikuar. Sipas zëvendëskryeministrit dhe ministër i financave, Gëllëb Donev, pagesa e pestë prej më shumë se 1,8 miliardë eurosh nga Plani i Rimëkëmbjes dhe Qëndrueshmërisë (PRQ) nuk pritet të ndikojë në këtë shifër.

Gjatë një seance pyetje-përgjigjesh në parlament, opozita e pyeti ministrin nëse këto para nga plani i rimëkëmbjes do të bënin që deficiti i buxhetit të ishte më i ulët se 5,7%. Donev tha se, sipas të dhënave paraprake, deri në fund të shtatorit deficiti i buxhetit ishte 2,8% e Prodhimit të Brendshëm Bruto (PBB). Megjithatë, ai shpjegoi se zakonisht në tre muajt e fundit të vitit qeveria shpenzon shumë më tepër para. Këto shpenzime përfshijnë pagesa sociale, investime dhe projekte infrastrukturore, mirëmbajtjen dhe pastrimin e rrugëve, si dhe shpenzime të tjera.

Në shtator, çmimet në Bullgari ranë me 0,3% krahasuar me muajin gusht. Kjo është hera e dytë këtë vit që regjistrohet një rënie mujore e çmimeve, pas asaj të muajit qershor. Megjithatë, nëse krahasojmë çmimet me shtatorin e vitit të kaluar, ato janë ende 5,6% më të larta. Pra, edhe pse në një muaj çmimet ranë pak, në krahasim me një vit më parë kostoja e jetesës vazhdon të jetë më e lartë. Këto janë të dhënat paraprake të publikuara nga Instituti Kombëtar i Statistikave të Bullgarisë.

Redaktoi: Ivo Ivanov

Përgatiti në shqip: Svetllana Dimitrova

Një brazilian është kandidati kryesor për drejtimin e kombëtares së futbollit

Fri, 02 Oct 2026 12:19:29 GMT

Ish-mbrojtësi i Arsenalit, Selta, Barcelonës dhe Mançester Cityt, Silvinjo, është kandidati kryesor për postin e trajnerit të përhershëm të kombëtares së futbollit të Bullgarisë, njofton Agjencia Telegrafike Bullgare (BTA).

Deri në verën e këtij viti, Silvinjo drejtoi kombëtaren e Shqipërisë dhe e çoi ekipin kuqezi në një arritje historike: pjesëmarrjen e parë në Kampionatin Evropian, Euro 2024. Ai ka drejtuar gjithashtu Lionin dhe klubin e vendlindjes së tij, Korintians, përpara se të merrte drejtimin e Shqipërisë në vitin 2023.

Braziliani, emri i plotë i të cilit është Silvio Mendesh Kampos Zhunior, jeton në Itali. Nëse ai merr drejtimin e kombëtares bullgare, pritet të ketë si ndihmës ish-mbrojtësin spanjoll të Mançester Cityt dhe Uest Hamit, Pablo Zabaleta.

Kombëtarja bullgare mbeti pa trajner pasi Aleksandër Dimitrov dha dorëheqjen pas humbjes së Bullgarisë në shtëpi ndaj Luksemburgut dhe barazimit 0:0 me Estoninë në Plovdiv më 29 shtator.

Për momentin, kombëtarja bullgare drejtohet nga Atanas Ribarski.

Lexoni më shumë mbi temën:

Trajnerii kombëtares largohet nga detyra pas barazimit pa gola me Estoninë

Redaktoi: Ivo Ivanov

Përgatiti në shqip: Svetllana Dimitrova

Mbi 58% e bullgarëve mendojnë se lufta në Ukrainë nuk ka zgjidhje ushtarake

Fri, 02 Oct 2026 11:13:15 GMT

Çmimet e larta dhe inflacioni konsiderohen problemi më serioz me të cilin përballet Bullgaria. Kështu mendojnë 53,7% e të anketuarve në një sondazh përfaqësues të agjencisë “Harris”, të porositur nga gazeta “Trud” dhe të zhvilluar nga 23 deri më 28 shtator. Keqqeverisja e vendit renditet si problem nga 13,6% e të anketuarve, korrupsioni dhe reforma në drejtësi nga 12,5%, ndërsa papunësia dhe të ardhurat e ulëta nga 10,1%. Luftërat në Ukrainë dhe Lindjen e Mesme përmenden si problem nga 7,7% e të anketuarve.

Sa i përket qeverisë së Rumen Radevit, 34,8% e të anketuarve mendojnë se ajo po e drejton vendin me sukses, ndërsa 44,6% e vlerësojnë punën e saj si më tepër të pasuksesshme. Një tjetër 20,6% nuk kanë mundur të krijojnë një qëndrim.

Në sondazh, 58,4% shprehen dakord me kryeministrin Radev se lufta në Ukrainë nuk mund të zgjidhet me mjete ushtarake dhe se liderët e Bashkimit Evropian duhet të vendosin kontakte diplomatike me Rusinë. Kundër kësaj ideje janë shprehur 18%, ndërsa 23,6% nuk mundur të japin përgjigje.

Ndërkohë, 46,5% mendojnë se Ukraina duhet të arrijë një marrëveshje paqeje me Rusinë, edhe nëse kjo do të nënkuptonte lëshime territoriale. 26,1% janë kundër këtij qëndrimi, ndërsa 27,4% nuk kanë një qëndrim të qartë, raporton Agjencia Telegrafike Bullgare (BTA).

Redaktoi: Ivo Ivanov

Përgatiti në shqip: Svetllana Dimitrova

Trafik i rënduar për kamionët që udhëtojnë drejt Turqisë

Fri, 02 Oct 2026 09:53:18 GMT

Trafiku është i rënduar në pikat kufitare me Turqinë, “Kapitan Andreevo” dhe “Lesovo”, në drejtim të daljes nga Bullgaria për automjetet e transportit të mallrave, njofton Policia Kufitare. Në pikat e tjera kufitare me Greqinë, Maqedoninë e Veriut, Serbinë dhe Rumaninë, qarkullimi është normal për fundin e javës së punës.

Në autostradën “Hemus”, ndërmjet kilometrave 350 dhe 363, drejtimi për në Sofje vijon të jetë i mbyllur. Trafiku zhvillohet në të dyja drejtimet në karrexhatën që shkon drejt Varnës. E njëjta skemë qarkullimi është vendosur edhe në segmentin mes Ignatievos dhe kryqëzimit rrugor “Aeroporti”.

Në autostradën “Marica”, në segmentin nga kilometri 109 deri në kilometrin 111, në drejtim të pikës kufitare “Kapitan Andreevo”, qarkullimi zhvillohet vetëm në një korsi në tre segmente të njëpasnjëshme. Kufizimi është vendosur për shkak të punimeve për riparimin e fugave të dëmtuara në nënkalimet bujqësore dhe në një urë. Shpejtësia maksimale e lejuar në këtë pjesë është kufizuar në 50 km/h.

Redaktoi: Ivo Ivanov

Përgatiti në shqip: Svetllana Dimitrova

Bullgarët në Maqedoni kundërshtojnë përfshirjen me kusht në Kushtetutë

Fri, 02 Oct 2026 09:32:17 GMT

Përfaqësues të organizatave bullgare në Maqedoninë e Veriut u dëgjuan nga Komisioni Parlamentar për Politikat ndaj Bullgarëve Jashtë Vendit. Para deputetëve, ata paraqitën një deklaratë proteste kundër idesë që bullgarët të përfshihen në Kushtetutën e Maqedonisë së Veriut vetëm me kusht, duke e shtyrë zbatimin e kësaj dispozite për një periudhë të mëvonshme. Përfaqësuesit e organizatave bullgare theksuan se përfshirja e tyre vetëm në preambulën e Kushtetutës, pa u përfshirë edhe në ligjet që përcaktojnë të drejtat e komuniteteve, nuk do të përmbushte angazhimin e marrë.

“Ne meritojmë të njëjtat të drejta si komunitetet e tjera dhe nuk duam të vazhdojmë të trajtohemi si qytetarë me më pak të drejta”, deklaroi para deputetëve Marinella Petreska, kryetare e Shoqatës për Miqësi Maqedono-Bullgare në Manastir. “Për ne, kjo do të nënkuptonte edhe disa vite të tjera pa mbrojtje kushtetuese. Gjatë kësaj kohe, bullgarët në Republikën e Maqedonisë së Veriut do të mbeteshin të ekspozuar ndaj diskriminimit, gjuhës së urrejtjes, ndjekjeve penale dhe sulmeve fizike për shkak të identitetit të tyre kombëtar. Ne nuk jemi objekt negocimi dhe nuk mund të presim pafundësisht. Meritojmë të njëjtat të drejta si komunitetet e tjera dhe nuk pranojmë të vazhdojmë të jemi në pozitë të pabarabartë”, tha Petreska.

Bullgarët në Maqedoninë e Veriut u bëjnë thirrje institucioneve bullgare dhe Bashkimit Evropian që të mos lejojnë shmangien ose anashkalimin e kushteve për të cilat është rënë dakord. Disa prej deputetëve e mbështetën deklaratën dhe u shprehën se të drejtat e komunitetit bullgar në Maqedoninë e Veriut duhet të mbrohen në këtë mënyrë, raportoi Dobrina Karambollova për programin “Horizont” të Radios Kombëtare Bullgare.

Lexoni më shumë mbi temën:

Redaktoi: Ivo Ivanov

Përgatiti në shqip: Svetllana Dimitrova

“Ndalo, mos ik…” – hiti i Mitko Shterevit që mbijetoi filmin “Adaptimi”

Fri, 02 Oct 2026 06:53:20 GMT

“Adaptimi”, e njohur sidomos nga vargu i parë i saj, “Ndalo, mos ik…”, është një nga këngët më të dashura të krijuara për kinemanë bullgare. Kënga është pjesë e filmit “Adaptimi”, një dramë televizive në tri seri, e realizuar në vitin 1979 nga regjisori i njohur bullgar Vëllo Radev (1923–2001). Në qendër të historisë, me skenar të Rajna Tomovës dhe Vëllo Radevit, është një klinikë për pacientë me probleme të shëndetit mendor. Ajo që i bashkon pacientët është frika – nga njerëzit, nga dashuria, nga jeta dhe nga vdekja. Në klinikë është e shtruar edhe Veronika, një grua e re dhe e bukur. Psikiatri i ri, doktor Bankov, u kushton pacientëve pothuajse të gjithë kohën e tij dhe shfrytëzon një metodë që për kohën ishte e pazakontë: psikoterapinë në grup. Gjatë seancave, secili prej pacientëve duhet të ndajë frikat e veta dhe të përpiqet të flasë, të veprojë dhe të ndiejë pa frikë. Por Veronika, ndryshe nga të tjerët, nuk arrin të përballet me veten. Ndërkohë, ajo bie në dashuri me doktorin. Dhe pikërisht kjo ndjenjë bëhet çelësi për të kuptuar dramën e saj të brendshme. Në vitet ’70 të shekullit të XX-të, të flisje për dhunën ndaj individit dhe për mungesën e perspektivës që përballnin të rinjtë – të brishtë, të pambrojtur dhe që nuk donin t’i përshtateshin sistemit – ishte më shumë se e guximshme: ishte skandaloze. Filmi u pa si një metaforë për shoqërinë bullgare të kohës dhe ngjalli reagime të forta te publiku dhe institucionet. Këto të fundit këmbëngulnin që njerëzit të silleshin në përputhje me atë që kërkonte sistemi. Edhe personazhi i doktor Vllado Bankovit kishte një prototip real: Georgi Kamenov (1942–2006), një nga pionierët e psikoterapisë në grup në Bullgari. Që në fillim të viteve ’70, ai kishte nisur të drejtonte grupet e para të psikoterapisë në Sofje.

Ideologjia sunduese e asaj kohe e cilësonte psikoterapinë dhe psikanalizën si “borgjeze dekadente”. Edhe para se filmi të dilte në ekran, doktori Kamenov iu nënshtrua presioneve dhe poshtërimeve. Grupet psikoterapeutike u ndërprenë dhe mjeku u detyrua të emigronte.

Burgasi në prag të stafetës ndërkombëtare çiklistike COP31 Bike Ride

Fri, 02 Oct 2026 06:09:06 GMT

Më 4 dhe 5 tetor, Burgasi do të presë stafetën ndërkombëtare çiklistike COP31 Bike Ride, e cila këtë vit do të përshkojë më shumë se 22 mijë kilometra nëpër tri kontinente dhe mbi 20 shtete, në rrugëtimin drejt Konferencës së OKB-së për Ndryshimet Klimatike, COP31, që do të zhvillohet në Antalia të Turqisë, njoftoi Bashkia e Burgasit.

Në Bullgari, stafeta do të ndjekë dy itinerare. Njëri nis nga Sofja dhe vazhdon përmes Plovdivit drejt Burgasit, ndërsa grupi kryesor ndërkombëtar hyn në vend përmes Silistrës dhe vijon përgjatë bregdetit të Detit të Zi. Të dyja degët do të bashkohen në Burgas më 4 tetor, ndërsa mëngjesin e ditës pasuese çiklistët do të nisen së bashku drejt Turqisë.

Një film i Teodor Ushevit është në listën e shkurtër për çmimin “César”

Fri, 02 Oct 2026 05:33:09 GMT

Filmi i shkurtër i animuar “Jeta me një idiot” (La vie avec un idiot), me regji të Teodor Ushevit dhe bazuar në novelën me të njëjtin titull të Viktor Jerofejevit, është përfshirë në listën e shkurtër për çmimin “César”. Lajmin e bëri të ditur vetë animatori në Facebook. Filmi do të konkurrojë për një nominim në kategorinë e filmit më të mirë të shkurtër të animuar, njoftoi Agjencia Telegrafike Bullgare (BTA).

“Është një përvojë jashtëzakonisht emocionuese të jem pjesë e kësaj përzgjedhjeje prej 12 veprash të jashtëzakonshme”, shkruan Ushevi. “Më emocionon fakti që ky film ‘sfidues’ është mes 12 filmave më të mirë të shkurtër të vitit, në një skenë kaq konkurruese si ajo e animacionit francez. Aq më tepër që bëhet fjalë për filmin tim të parë të prodhuar tërësisht në Francë!”, shton animatori.

Për përzgjedhjen fillestare u paraqitën 48 filma. Pas votimit, numri i tyre u reduktua fillimisht në 20 dhe, në raundin e tretë, në 12 finalistë. Nominimet përfundimtare për çmimet “César” do të shpallen më 22 janar 2027.

Kur e prezantoi për herë të parë në Bullgari, vitin e kaluar, filmin “Jeta me një idiot”, Ushevi tha se idiotizmi po pushton botën.

Redaktoi: Miglena Ivanova

Përgatiti në shqip: Svetllana Dimitrova

Ruse e nis vjeshtën me Urban Wine Fest

Fri, 02 Oct 2026 04:43:10 GMT

Më 2 dhe 3 tetor, sheshi “Svoboda” në Ruse do të presë edicionin e dytë të festivalit të verës Urban Wine Fest – Ruse 2026.

Veprimtaria shënon zyrtarisht nisjen e muajit kushtuar verës bullgare dhe Ditës Ndërkombëtare të Mavrudit, më 26 tetor. Nisma është e Shoqatës Bullgare të Profesionistëve të Verës dhe është pjesë e një serie festivalesh dhe aktivitetesh që zhvillohen në mbarë vendin, kushtuar verës bullgare.

Festivali organizohet me mbështetjen e Ministrisë së Turizmit dhe Ministrisë së Bujqësisë dhe Ushqimit, në partneritet me Bashkinë e Ruses, njoftoi administrata e qytetit buzë Danubit.

Vizitorët do të kenë mundësinë të gjejnë “mesazhin e tyre në shishe”, përmes një përzgjedhjeje të kujdesshme prej më shumë se 40 verërash bullgare, të prodhuara nga kantina të vogla dhe nga 15 varietete vendase rrushi.

Redaktoi: Miglena Ivanova

Përgatiti në shqip: Svetllana Dimitrova

Parashikimi i motit për 2 tetor 2026

Thu, 01 Oct 2026 22:30:52 GMT

Të premten temperaturat minimale do të jenë nga 11 deri në 13°C. Për Sofjen pritet të jenë rreth 5°C.

Mbi Bullgarinë Perëndimore dhe Qendrore do të mbajë pothuajse pa erë dhe në disa zona në mëngjes do të ketë kushte për formimin e brymës. Në gjysmën lindore të vendit do të fryjë erë e dobët deri mesatare nga veriu. Gjatë ditës moti do të jetë kryesisht me diell, ndërsa pasdite do të ketë vranësira të shpërndara në lartësi mesatare dhe të mëdha. Mbi rajonet juglindore vranësirat do të jenë më të dendura dhe në disa vende do të ketë reshje shiu. Do të fryjë erë mesatare, ndërsa në Bullgarinë Lindore herë pas here e fortë nga verilindja. Temperaturat maksimale do të jenë nga 18 deri në 23°C. Në kryeqytet do të jenë rreth 18°C.

Në bregdetin e Detit të Zi moti do të jetë kryesisht me diell. Pasdite do të ketë shtim të përkohshëm të vranësirave, më i theksuar në bregdetin jugor, ku priten reshje të dobëta shiu. Është lëshuar paralajmërim për erë të fortë përgjatë bregdetit. Temperaturat maksimale të ajrit do të jenë nga 18 deri në 20°C. Temperatura e ujit të detit është 20-21°C. Deti do të jetë i trazuar, me vallëzim 3-4 ballë.

Në male moti do të jetë kryesisht me diell, me shtim të përkohshëm të vranësirave pasdite, por pa reshje. Do të fryjë erë e fortë nga verilindja. Temperatura maksimale në 1200 metra lartësi do të jetë rreth 12°C, ndërsa në 2000 metra rreth 5°C.

Redaktoi: Ivo Ivanov

Përgatiti në shqip: Vesella Mançeva

Gazi natyror shtrenjtohet me 6% në tetor

Thu, 01 Oct 2026 17:42:23 GMT

Çmimi i gazit natyror rritet me 6% nga sot dhe gjatë muajit tetor një megavat-orë do të shitet për 44,09 euro, pa përfshirë tarifat dhe taksat. Ky është vendimi përfundimtar i Komisionit për Rregullimin e Energjisë dhe Ujërave, i cili nuk miratoi kërkesën e “Bulgargaz” për një rritje shtesë prej rreth 1%.

Sipas argumentimit të rregullatorit, zhvillimet e tregut për çmimin e gazit natyror gjatë muajve të dimrit nuk janë të favorshme. Për këtë arsye, çmimi i gazit nuk duhet të rritet më tej që këtë muaj, pasi ai përbën mbi 70% të çmimit përfundimtar të ngrohjes dhe ujit të ngrohtë. Çdo ndryshim i çmimit të gazit reflektohet drejtpërdrejt te konsumatorët, raportoi gazetarja Julijana Kornazheva.

Redaktoi: Miglena Ivanova

Përgatiti në shqip: Svetllana Dimitrova

Gjeneratorët e F-16 Block 70 do të mund të riparohen në Bullgari

Thu, 01 Oct 2026 16:32:09 GMT

Me 159 vota, parlamenti ratifikoi ndryshimet në Marrëveshjen Kuadër ndërmjet Ministrisë së Ekonomisë dhe Kompanisë “Lockheed Martin Global”, të cilat i hapin rrugë riparimit në territorin e Bullgarisë të gjeneratorëve të avionëve luftarakë F-16 Block 70 nga kompania shtetërore “Avionams”. Në marrëveshje theksohet shprehimisht se bëhet fjalë jo vetëm për riparimin e gjeneratorëve të F-16 Block 70 të Bullgarisë, por edhe të atyre të vendeve fqinje që kanë avionë të këtij modeli dhe nuk disponojnë kapacitete të tilla riparimi.

Kundër ndryshimeve votoi vetëm grupi parlamentar i “Vëzrazhdane”.

Qeveria pret që projekti të sjellë vlerë të lartë të shtuar për Bullgarinë, pasi aktualisht një kapacitet i ngjashëm ekziston vetëm në një vend anëtar të Bashkimit Evropian – Poloni.

Redaktoi: Miglena Ivanova

Përgatiti në shqip: Svetllana Dimitrova

Kandidati për ambasador i SHBA-së theksoi prioritetet e tij për Bullgarinë

Thu, 01 Oct 2026 16:11:31 GMT

Bullgaria është një aleate kyçe e SHBA-së për sigurinë në rajonin e Detit të Zi, ndërsa marrëdhëniet midis Sofjes dhe Uashingtonit mund të zgjerohen ndjeshëm në fushat e mbrojtjes, energjisë, inteligjencës artificiale dhe lëndëve të para kritike. Këtë e deklaroi Douglas Holder, i propozuar nga presidenti Donald Trump për ambasador të SHBA-së në Bullgari, gjatë seancës së dëgjimit para Komitetit për Marrëdhënie me Jashtë të Senatit amerikan. Emërimi i tij ende duhet të kalojë procedurën e konfirmimit.

I pyetur nga senatorja e Partisë Demokratike Jeanne Shaheen lidhur me njoftimin e kryeministrit Rumen Radev për uljen e ndihmës për Ukrainën, ai tha se synon të bisedojë me qeverinë bullgare për rëndësinë e vazhdimit të kësaj ndihme.

Douglas Holder theksoi se puna e tij në Sofje do të përqendrohet te diplomacia ekonomike, pasi SHBA-ja dhe Bullgaria mund të përmirësojnë më tej lidhjet tregtare mes tyre, njofton BTA.

Redaktoi: Ivo Ivanov

Përgatiti në shqip: Vesella Mançeva

Lester Stjuarti, amerikani i parë që përshkoi “Kaminon e Bullgarisë”

Thu, 01 Oct 2026 15:51:17 GMT

Lester Stjuarti është amerikani i parë që përshkoi “Kaminon e Bullgarisë”, duke ndjekur itinerarin e pelegrinazhit në rajonin e Burgasit. Rruga nis në Mallko Tarnovo, kalon përmes malit Stranxha dhe zonave bregdetare, për të përfunduar në Sozopoll, njoftoi Bashkia e Burgasit.

Bullgaria sot – 1 tetor 2026

Thu, 01 Oct 2026 15:00:33 GMT

Të nderuar miq, në fillim të programit tonë më 1 tetor 2026 ju sjellim lajmet e fundit.

Pas kësaj do t’ju takojmë me Vu Nguen – një vietnamez në Bullgari.

Me rastin e 1 tetorit – Ditës Botërore të Muzikës, ju sjellim informacion për këngëtaren e dashur bullgare Margarita Hranova. Në rubrikën tonë “Muzikë” në sajtin tonë mund të dëgjoni këngën e saj “Gjurmë”.

Ju urojmë minuta të këndshme!

01.33 - Lajmet
10.29 - Personalite
16.56 - Muzikë

“Nata e Letërsisë” ngre “fole” në 12 qytete bullgare dhe në një fshat

Thu, 01 Oct 2026 14:00:26 GMT

Për të pesëmbëdhjetën herë, Bullgaria i bashkohet nismës “Nata e Letërsisë” – një format frymëzues që na jep mundësinë të dëgjojmë pjesë nga vepra të autorëve, krijimtaria e të cilëve nuk vihet shpesh nën dritën e projektorëve. Leximet zhvillohen në vende jo tipike për letërsinë, të quajtura “fole leximi”. Këtë vit, më 1 tetor, letërsia evropiane dhe bullgare ndërtojnë “fole” në 12 qytete të mëdha – Sofje, Pllovdiv, Varna, Burgas, Bllagoevgrad, Veliko Tërnovo, Gabrovo, Dobriç, Lloveç, Pazharxhik, Ruse, Stara Zagora – dhe në një fshat bullgar, Çavdar.

Qeveria nuk do ta heqë taksën e sheshtë mbi të ardhurat

Thu, 01 Oct 2026 13:31:55 GMT

Bullgaria ndodhet në procedurë për deficit të tepruar, një procedurë që ne e trashëguam. Këtë vit deficiti do të jetë shumë mbi 3%; nëse do të jetë 5% apo 5,7%, kjo nuk ka rëndësi. Qeveria jonë duhet të veprojë shpejt. Ne kemi marrë angazhime dhe do të propozojmë masa, tha për BNT zëvendëskryeministri Atanas Pekanov.

Lidhur me taksën e propozuar njëherëshe mbi fitimet e jashtëzakonshme të disa bizneseve, ai solli si shembull faktin se një masë e tillë është zbatuar edhe në vende të BE-së si Spanja, Lituania dhe Portugalia.

Pekanov tha se me këtë taksë do të preken kryesisht sektorë me pronësi të huaj, por theksoi se edhe ata duhet të kontribuojnë në stabilizimin fiskal të vendit.

“Fondi Monetar Ndërkombëtar propozon që të heqim dorë nga taksa e sheshtë, por ne nuk do ta bëjmë këtë, sepse kemi marrë një angazhim të tillë”, theksoi zëvendëskryeministri.

Redaktoi: Ivo Ivanov
Përgatiti në shqip: Vesella Mançeva

Buxheti i shtetit për vitin 2027 do të diskutohet me emisarë të KE-së

Thu, 01 Oct 2026 12:29:05 GMT

Qeveria po përgatit masa për rritjen e të ardhurave dhe kufizimin e shpenzimeve, me një efekt të përgjithshëm buxhetor të pritshëm prej rreth 2,2 miliardë eurosh. Prej tyre, 750 milionë euro do të kursehen përmes shkurtimit të shpenzimeve, tha ministri i Financave Gëllëb Donev për televizionin “Nova”.

Sipas tij, tejkalimi i deficitit buxhetor nuk mund të arrihet vetëm përmes rritjes së të ardhurave shtesë. Ministria po vlerëson të gjitha shpenzimet, duke nisur nga projektet kapitale, dhe po përgatit ristrukturimin e njësive joefikase në administratën shtetërore.

Donev theksoi se financimi i projekteve joefikase do të kufizohet, ndërsa shpenzimet për strukturat administrative tepër të fryra do të reduktohen.

Lidhur me taksimin e njëhershëm të fitimeve të jashtëzakonshme të bankave, Donev tha se ai dhe ekspertët e ministrisë nuk presin që kjo taksë të çojë në rritjen e normave të interesit për kreditë. Sipas të dhënave të tij, fitimet e bankave janë rritur me 588 për qind gjatë pesë viteve të fundit.

Ministri siguroi se afatet ligjore për përgatitjen e buxhetit për vitin 2027 do të respektohen. Më 5 dhe 6 tetor, përfaqësues të Komisionit Evropian do të jenë në Bullgari për të diskutuar parametrat e buxhetit.

Redaktoi: Ivo Ivanov

Përgatiti në shqip: Vesella Mançeva

I ngarkuar trafiku i kamionëve në kufirin me Turqinë

Thu, 01 Oct 2026 09:56:44 GMT

Trafiku është intensiv për automjetet e rënda në pikat kufitare “Kapitan Andreevo” dhe “Lesovo”, në dalje drejt Turqisë, njoftojnë nga Policia Kufitare. Kalimi në pikat dhe vendkalimet e tjera kufitare me Greqinë, Maqedoninë e Veriut, Serbinë dhe Rumaninë zhvillohet normalisht. Për shkak të nivelit të ulët të ujit në lumin Danub, nuk funksionojnë tragetet në linjat Orjahovo–Beket dhe Svishtov–Zimniç.

Më 1 tetor, nga ora 10:30, në autostradën “Trakia”, në zonën e Çirpanit, për shkak të mirëmbajtjes dhe zëvendësimit të kamerave, përkohësisht do të kufizohet qarkullimi në njërën nga korsitë në drejtim të Burgasit, njoftuan nga Agjencia e Infrastrukturës Rrugore.

Për të njëjtën arsye, qarkullimi në një segment të Unazës Veriore të Shpejtë të Sofjes do të devijohet midis nyjës rrugore “Çepinsko Shose” dhe nyjës rrugore “Botevgradsko Shose” në intervalet kohore nga ora 21:00 deri në 22:00 dhe nga ora 22:00 deri në 23:00.

Redaktoi: Ivo Ivanov

Përgatiti në shqip: Vesella Mançeva

Teknologjitë e reja e bëjnë hapësirën tashmë të arritshme për të gjitha vendet

Thu, 01 Oct 2026 08:56:31 GMT

Bullgaria jo vetëm që ka një histori të gjatë në kërkimet, shkencën dhe teknologjitë hapësinore, por ka edhe vendin e saj të merituar në përpjekjet e përbashkëta të sotme për zhvillimin e kapaciteteve evropiane në fushën e hapësirës. Këtë e deklaroi Kryeministri Rumen Radev në Samitin e Mbrojtjes dhe Hapësirës të “Euronews” në Bruksel, cituar nga Shërbimi Informativ i Qeverisë.

Kryeministri vuri në pah traditat e forta të vendit në këtë fushë, si edhe arritjet e reja, shembull i shkëlqyer i të cilave është kompania bullgare “EnduroSat”.

“Unë aspak nuk jam avokat i Presidentit rus Vlladimir Putin dhe i Ministrit të Jashtëm rus Sergej Llavrov. Kur Putini ndihet i fortë, ai nuk flet për armët bërthamore, por kur Rusia ndihet e dobët, fillon sërish të flitet për armët atomike. Thjesht po kujtoj se duhet ta kemi këtë parasysh. Nuk mund të mbyllim sytë para faktit se Rusia disponon fuqi bërthamore në Evropë dhe kjo hyn në llogari. Askush nuk e merr këtë parasysh”, tha Radev në një intervistë për “Euronews”.

E ardhmja e Ukrainës, Moldavisë dhe Ballkanit Perëndimor është në BE

Redaktoi: Ivo Ivanov

Përgatiti në shqip: Vesella Mançeva

Ndërmjetës mes njerëzve në nevojë dhe institucioneve

Thu, 01 Oct 2026 07:00:23 GMT

Në zona ku ende mbizotëron varfëria dhe ku informacioni që lidhet me shëndetin dhe statusin shoqëror nuk arrin te njerëzit, jetojnë persona, mbijetesa e të cilëve varet nga cilësi të fshehura pas fjalës „humanizëm“. Kështu, në vitin 2001, lindi profesioni i ndërmjetësit shëndetësor, me qëllim që të lidhë njerëzit në nevojë me institucionet në Bullgari që mund të kujdesen për ta.

Prof. Ivajllo Tërnev filloi të punojë me komunitetin rom më shumë se 30 vjet më parë. Drejtuesi i Klinikës së Sëmundjeve të Nervave në Spitalin Aleksandrovska në Sofje, për muaj të tërë, udhëtoi nëpër lagje dhe sot është i bindur se pothuajse nuk ka vend që të mos e ketë vizituar të paktën një herë.

Margarita Hranova lë “Gjurmë” në thesarin e muzikës bashkëkohore bullgare

Thu, 01 Oct 2026 06:00:23 GMT

Margarita Hranova, e cila me zërin e saj të papërsëritshëm ka lënë gjurmë te breza të tërë adhuruesish të muzikës bullgare, prezanton këngën e saj të re “Gjurmë”. Edhe kësaj here muzika është e Biljana Angellovës, autore e disa prej këngëve më të buta dhe më prekëse të këngëtares. Margarita Hranova thotë:

“Kompozimet e Biljanës janë po aq melodike sa edhe të pazakonta nga pikëpamja muzikore. Unë e sfidoj vazhdimisht veten. Edhe kur më propozohet diçka që nuk është krejtësisht në stilin tim, përpiqem ta bëj timen dhe mendoj se ia dal.”

Virtuozët Tu Le dhe Samuel Solomon hapin GuitArt Festival në Plovdiv

Thu, 01 Oct 2026 05:26:07 GMT

Nga 1 deri më 4 tetor 2026, Plovdivi do të shndërrohet sërish në kryeqytetin e artit të kitarës. Edicioni i dhjetë jubile i GuitArt Festival do të mbledhë në një skenë mjeshtër të njohur ndërkombëtarë dhe muzikantë të shquar bullgarë nga zhanre dhe breza të ndryshëm.

Programi i pasur katërditor përfshin koncerte, shfaqje multimediale, klasa mjeshtërie, punëtori, konkurs ndërkombëtar për kitarë klasike dhe takime me ndërtues kitarash.

Hapjen zyrtare të festivalit do ta bëjnë dy artistë mbresëlënës: kitaristja vietnameze me famë botërore Tu Le dhe kitaristi e pedagogu bullgar Samuel Solomon.

Parashikimi i motit për 1 tetorin 2026

Wed, 30 Sep 2026 19:23:43 GMT

Gjatë natës moti do të jetë kryesisht i kthjellët. Pas mesnate, në zonat juglindore dhe përgjatë bregdetit të Detit të Zi, vranësirat do të shtohen sërish. Në shumë vende do të ketë reshje të dobëta shiu, ndërsa gjatë orëve të mëngjesit dukshmëria do të jetë e kufizuar. Do të fryjë erë e dobët deri mesatare nga verilindja. Temperaturat minimale do të jenë nga 6° deri në 11°, ndërsa në Sofje rreth 6°.

Të enjten, shtimi i vranësirave që do të nisë nga lindja dhe juglindja do të përfshijë edhe Bullgarinë Qendrore. Në gjysmën lindore të vendit vranësirat do të jenë të dendura. Në disa zona të Bullgarisë Juglindore do të ketë reshje shiu, të cilat vende-vende të skajit juglindor do të jenë më të shumta. Në Bullgarinë Perëndimore moti do të jetë kryesisht me diell. Do të fryjë erë mesatare nga veriu-verilindja, e cila në zonat lindore përkohësisht do të jetë e fortë. Temperaturat maksimale do të jenë nga 18° deri në 23°, ndërsa në Sofje rreth 18°.

Në zonat malore moti do të jetë kryesisht me diell. Do të fryjë erë mesatare nga verilindja, ndërsa në zonat e larta dhe të ekspozuara era do të jetë e fortë. Temperatura maksimale në lartësi 1200 metra do të jetë rreth 12°, ndërsa në 2000 metra rreth 5°.

Përgjatë bregdetit të Detit të Zi do të mbizotërojë moti i vranët. Reshje shiu do të ketë kryesisht përgjatë bregdetit jugor, ndërsa në disa zona reshjet do të jenë të dendura. Temperaturat maksimale do të jenë 18°–20°, ndërsa temperatura e ujit të detit do të jetë 20°–22°. Deti do të jetë i trazuar, me dallgëzime të shkallës 3–4 ballë.

Redaktoi: Diana Cankova

Përgatiti në shqip: Svetllana Dimitrova

Bullgaria i ka dërguar KE-së kërkesën e fundit për financim në kuadër të PRQ

Wed, 30 Sep 2026 18:51:59 GMT

Sot Bullgaria i ka dërguar Komisionit Evropian kërkesën e pestë dhe të fundit për pagesë në kuadër të Planit Kombëtar të Rimëkëmbjes dhe Qëndrueshmërisë (PRQ), me vlerë 1,823 miliardë euro, njoftoi qeveria.

Me këtë kërkesë, vendi raporton përmbushjen e 59 etapave dhe objektivave të fundit që lidhen me reforma dhe investime kyçe sipas planit. Mes tyre janë krijimi i Komisionit të ri për Luftën kundër Korrupsionit, vendosja e testeve të integritetit për nëpunësit shtetërorë, përmirësimi i sistemit të prokurimeve publike, si dhe zbatimi i masave për rritjen e cilësisë së shërbimeve të furnizimit me ujë dhe kanalizimeve, raportoi gazetarja Cvetelina Stojanova.

Komisioni Evropian pritet të kryejë vlerësimin e kërkesës për pagesë brenda një periudhe prej dy muajsh.

Redaktoi: Miglena Ivanova

Përgatiti në shqip: Vesella Mançeva

E ardhmja e Ukrainës, Moldavisë dhe Ballkanit Perëndimor është në BE

Wed, 30 Sep 2026 18:35:27 GMT

“Nuk i kemi shteruar ende mjetet e diplomacisë për zgjidhjen e luftës në Ukrainë”, deklaroi sot kryeministri Rumen Radev në një intervistë për televizionin Euronews në Bruksel, gjatë një forumi të nivelit të lartë të organizuar nga media dhe kushtuar mbrojtjes dhe hapësirës kozmike.

Në forum morën pjesë gjithashtu sekretari i përgjithshëm i NATO-s Mark Rutte, komisionerë evropianë, eurodeputetë, ministra, ambasadorë dhe zyrtarë të lartë ushtarakë, njoftoi BNR “Horizont”.

“Duhet të dëgjojmë shqetësimet e të dyja palëve”, shtoi kryeministri. Sipas tij, mbështetja për Ukrainën duhet të vazhdojë, por më e rëndësishmja është krijimi i kushteve për paqe.

“Ekziston një kufi për furnizimet me armë, sepse hapat e fundit drejt zgjidhjes do të arrihen përmes diplomacisë, e jo përmes dërgesave të armëve”, theksoi ai.

Në intervistën e tij, Radev u shpreh kategorik se e ardhmja e Ukrainës, Moldavisë dhe vendeve të Ballkanit Perëndimor është në Bashkimin Evropian.

Redaktoi: Miglena Ivanova

Përgatiti në shqip: Vesella Mançeva

Grekët, britanikët dhe ukrainasit mbizotërojnë mes studentëve të huaj në vend

Wed, 30 Sep 2026 17:46:53 GMT

Gjatë vitit akademik 2025/2026, në universitetet dhe shkollat e larta të specializuara në Bullgari kanë studiuar 16,8 mijë shtetas të huaj. Më të shumtët prej tyre janë grekët me 17% të numrit total, të ndjekur nga britanikët me 13,6%, ukrainasit me 12,4%, gjermanët me 8,9% dhe italianët me 5,7%, njofton Instituti Kombëtar i Statistikave (NSI).

Specialitetet më të kërkuara nga studentët e huaj janë ato të fushës së shëndetësisë, ku studiojnë 59,8% e tyre. Nga të gjithë studentët e huaj, 46,1% ndjekin degën e mjekësisë.

Numri i doktorantëve të huaj është 715, ose 12% e totalit të doktorantëve. Pesha më e madhe u takon doktorantëve nga Kina me 35,7%, të ndjekur nga ata nga Gjermania me 12,7% dhe Greqia me 11,7%.

Studentët bullgarë në universitetet dhe shkollat e larta të specializuara janë gjithsej 180,2 mijë. Gjatë vitit 2025 në Bullgari janë diplomuar 48,1 mijë persona, më së shumti në fushat “Biznes dhe Administrim”, “Arsim”, “Shëndetësi” dhe në specialitetet teknike.

Redaktoi: Miglena Ivanova

Përgatiti në shqip: Vesella Mançeva

U zbulua pranë Svishtovit një figurinë e rrallë bronzi

Wed, 30 Sep 2026 17:37:18 GMT

Një figurinë e rrallë bronzi e perëndisë së lashtë greke Priap është zbuluar gjatë gërmimeve arkeologjike në qytetin romak Novae, pranë Svishtovit. Nga rajoni i Danubit të Poshtëm deri tani njihen vetëm pesë gjetje të ngjashme, njoftoi Universiteti i Varshavës.

Novae po studiohet pa ndërprerje që nga viti 1960 nga një ekip i përbashkët arkeologësh polakë dhe bullgarë. Prof. Piotr Dyczek, drejtor i Qendrës për Studimin e Antikitetit të Evropës Juglindore në Universitetin e Varshavës, theksoi se zbulimet e reja përfshijnë gjithashtu një fragment unaze ari dhe dy altarë me mbishkrime, njëri prej të cilëve është ruajtur pothuajse tërësisht.

“Secili prej këtyre monumenteve është një pjesë tjetër e mozaikut që na ndihmon të kuptojmë më mirë jetën e banorëve të Novae dhe historinë e këtij qendre jashtëzakonisht të rëndësishme romake në Danub”, tha profesori.

Figurina prej bronzi u zbulua nga studiuesit e Universitetit të Varshavës gjatë kërkimeve në një kompleks monumental banimi, që shtrihet në një sipërfaqe prej më shumë se 3000 metrash katrorë, sqaroi për gazetën “24 Çasa” asistentja kryesore Petja Andreeva nga Instituti Arkeologjik me Muze pranë Akademisë Bullgare të Shkencave.

Mes gjetjeve të tjera janë suva me piktura dhe një dysheme shumëngjyrëshe e punuar me mjeshtëri të veçantë.

Redaktoi: Miglena Ivanova

Përgatiti në shqip: Vesella Mançeva

61% e mjekëve e vlerësojnë pozitivisht sistemin shëndetësor

Wed, 30 Sep 2026 15:40:31 GMT

Pagesat e larta shtesë, mungesa e mjekëve dhe infermierëve, si dhe mbulimi i pamjaftueshëm i shërbimeve nga Fondi Kombëtar i Sigurimit Shëndetësor, janë problemet më serioze në sektorin e shëndetësisë sipas qytetarëve. Kështu tregon një anketë kombëtare përfaqësuese e agjencisë "Trend", e prezantuar në forumin "Prioritet: Shëndeti", të organizuar nga Unioni Mjekësor Bullgar.

Mbi 60% e profesionistëve shëndetësorë e vlerësojnë gjendjen aktuale të sistemit si shumë të mirë ose më tepër të mirë. Të pyetur se cilat ndryshime duhet të jenë prioritet për sistemin shëndetësor, 39% përmendin mbajtjen e mjekëve të rinj në vend, 38% kërkojnë kontroll më të madh mbi shpenzimin e fondeve publike, ndërsa 35% theksojnë nevojën për paga më të mira.

Si vështirësi në punën e tyre të përditshme, gjysma e mjekëve dhe profesionistëve të tjerë shëndetësorë përmendin pagat e ulëta, 49% mungesën e specialistëve mjekësorë, ndërsa 34% ngarkesën e tepërt të punës.

Redaktoi: Ivo Ivanov

Përgatiti në shqip: Vesella Mançeva

Bullgaria sot - 30 shtator 2026

Wed, 30 Sep 2026 15:00:25 GMT

Të nderuar miq, në fillim të programit tonë më 30 shtator 2026 ju sjellim lajmet e fundit. Më pas do të dëgjoni një material nga rubrika jonë Kulturë.

Ndërsa në fund do ta mbyllim me muzikë të bukur nga Big Band-i i BNRS-së.

Ju urojmë minuta të këndshme!

01.51 - Lajmet
10.56 - Kulturë
14.15 - Muzikë

Shporta e vogël e konsumit u shtrenjtua me 8,6%, kastraveci rekord me 55,8%

Wed, 30 Sep 2026 14:43:04 GMT

Çmimet e 21 artikujve në shportën e vogël të konsumit, e cila përfshin 20 produkte ushqimore dhe benzinën A-95, janë rritur me 8,6% në bazë vjetore në shtator të këtij viti krahasuar me shtatorin e vitit të kaluar, ndërsa krahasuar me gushtin e këtij viti rritja është 0,7%, tregojnë të dhënat e KNSB-së. Çmimi i këtyre produkteve ka arritur tashmë në 62,06 euro, ose rreth 5 euro më shumë se një vit më parë. Me afro 31% është rritur për një vit çmimi i benzinës A-95, ndërsa buka më e blerë, “Dobruxha”, për 1 kilogram, është shtrenjtuar me 8,3%.

Domatet dhe kastravecët janë rekordmenët për rritjen e çmimeve gjatë vitit, përkatësisht me 48,9% dhe 55,8%, njoftoi gazetarja Cvetelina Stojanova.

Sipas presidentit të KNSB-së, Plamen Dimitrov, me pagën minimale në Bullgari mund të blihen 10 shporta të vogla konsumi, ndërsa nga tregu me shumicë deri te dyqanet marzhet e fitimit arrijnë nga 22% deri në 146%.

Redaktoi: Miglena Ivanova

Përgatiti në shqip dhe publikoi: Vesella Mançeva

Marie Vrinat ose kur gjuha bullgare tingëllon si frëngjisht

Wed, 30 Sep 2026 14:00:24 GMT

Profesoreshë Marie Vrinat-Nikolov është e vetmja përkthyese e letërsisë bullgare, gjuha amtare e së cilës është frëngjishtja. Ajo jep mësim për përkthim dhe gjuhë dhe letërsi bullgare në Institutin Kombëtar të Gjuhëve dhe Qytetërimeve Orientale në Paris (INALCO). Ka përkthyer në frëngjisht rreth pesëdhjetë libra të autorëve klasikë dhe bashkëkohorë, mes të cilëve edhe Georgi Gospodinov, i cili mori çmimin prestigjioz Booker për romanin e tij “Strehim kohe”. Ishte përkthimi i bërë nga Marie Vrinat, fituese e çmimit të përkthimit „Etienne Dolet“ të Sorbonës, që arriti tek audienca frëngjishtfolëse.

Në një intervistë për Radio Bullgarinë, Prof. Vrinat foli për përvojën e saj si përkthyese, mendimet e saj për përkthimin dhe mbrojtjen e letërsisë bullgare.

Pse pikërisht bullgarisht? Për Marie Vrinatën, shpjegimi nuk është rreptësisht racional:

„Unë kam menduar për këtë, sigurisht. Mikja dhe kolegia ime Biljana Kurtasheva më tha "bullgarishtja të ka zgjedhur" - më pëlqen ideja. Çdo gjuhë zgjon tek ne një botë imagjinare dhe ajo nuk është racionale. Mund të dal me shpjegime të ndryshme, por kjo nuk do të ishte arsyeja e vërtetë.“

Holanda dhe Spanja janë vendet më të preferuara nga studentët bullgarë

Wed, 30 Sep 2026 13:19:15 GMT

Holanda mbetet vendi më i preferuar nga studentët bullgarë që zgjedhin të kryejnë studimet e larta jashtë vendit, me 32% të preferencave, tregojnë të dhënat e një analize të “Integral Bulgaria”. Dy herë më shumë të rinj do t’i fillojnë studimet këtë vit akademik në Spanjë, e cila renditet e dyta me 16%. Pas tyre vijnë Austria dhe Italia me nga 10%, ndërsa Gjermania me 9%.

Vëmendja e studentëve bullgarë që aplikojnë për universitet mbetet kryesisht e përqendruar te Evropa. Ndër mundësitë tërheqëse për studime të larta janë arsimi pa pagesë në Finlandë, Suedi dhe Danimarkë, si dhe tarifat më të ulëta të studimit në Francë dhe Belgjikë. Monako, Malta dhe Hungaria janë gjithashtu ndër destinacionet që tërheqin interesin e nxënësve bullgarë.

Përveç kostove të studimit, në zgjedhjen e universitetit po luajnë gjithnjë e më shumë rol edhe ndryshimet e shpejta që sjell epoka digjitale. Biznesi, ekonomia, shkencat kompjuterike, teknologjia, inxhinieria dhe dizajni mbeten ndër fushat më të preferuara, por këtë vit u rrit edhe interesi për drejtësinë dhe psikologjinë.

Sipas ekspertëve të arsimit, këto janë fusha ku faktori njerëzor është përcaktues dhe që pritet të preken në një masë më të vogël nga inteligjenca artificiale.

Redaktoi: Diana Cankova

Përgatiti në shqip: Svetllana Dimitrova

Dyshja Jotova – Vëllçev, për momentin favorite në zgjedhjet presidenciale

Wed, 30 Sep 2026 12:43:44 GMT

Kandidatët për presidente dhe nënpresident, Ilijana Jotova dhe Kirill Vëllçev, kryesojnë me 41,4% ndaj kundërshtarëve të saj në zgjedhjet e ardhshme të 25 tetorit, tregojnë të dhënat e para për zgjedhjet nga një sondazh kombëtar i kryer nga “Market Links” dhe bTV, me pjesëmarrjen e 1006 personave përmes intervistave dhe një ankete online.

Në vendin e dytë renditen Andrej Gjurov dhe Georgi Kandev me 21,9%, ndërsa në vendin e tretë Kostadin Kostadinov dhe Petër Vollgin me 6,4%. Pas tyre vijnë Ivelin Mihajllov me 3,9%, Radostin Vasilev me 1,6% dhe Ivan Hristanov me 0,9%. Kandidatët e tjerë marrin gjithsej 3,7% të mbështetjes. Në zgjedhje do të marrin pjesë 27 dysha kandidatësh për president dhe nënpresident.

“Numri rekord i kandidatëve të regjistruar, në fakt, nuk tregon një shpërndarje shumë të madhe të votuesve në drejtime të ndryshme. Shohim se votuesit përsëri përqendrohen te kandidatët kryesorë dhe te dyshat kandidate për presidente më të njohura”, deklaroi përfaqësuesi i agjencisë, Dobromir Zhivkov, për bTV.

Mes 40% dhe 45% e bullgarëve kanë ndërmend të votojnë në zgjedhjet presidenciale.

Të dhënat tregojnë gjithashtu se besimi te qeveria e Rumen Radevit ka rënë nga 50% në maj në 39%, ndërsa mosbesimi është rritur nga 24% në 40%.

Redaktoi: Diana Cankova

Përgatiti në shqip: Svetllana Dimitrova

Në Plovdiv u vra biznesmeni Ilijan Filipov

Wed, 30 Sep 2026 12:15:05 GMT

Biznesmeni Ilijan Filipov, i lidhur me sektorin e transportit dhe të ndërtimit, u vra në një atentat me armë zjarri në Plovdiv. Ai u qëllua në kokë.

Ilijan Filipov ishte themelues dhe drejtues i kompanisë më të madhe të transportit në Bullgari, PIMK, e cila renditet gjithashtu ndër dhjetë kompanitë kryesore të transportit në Evropë. Biznesmeni ishte gjithashtu president i klubit të futbollit “Botev” – Plovdiv. Emri i tij lidhej edhe me ndërtimin e stadiumit “Hristo Botev”.

Sipas njoftimit të Ministrisë së Brendshme, rreth orës 01:00 u mor një sinjalizim për një burrë të qëlluar me armë zjarri në një adresë në një lagje të Plovdivit. Në vendngjarje u konstatua vdekja e tij dhe nisën veprimet hetimore për zbardhjen e ngjarjes së rëndë kriminale.

“Ilijan Filipov do të mbetet përgjithmonë pjesë e historisë së “Botev” – Plovdiv. Kontributi i tij në shpëtimin e klubit gjatë verës së vitit 2025 dhe përkushtimi i tij ndaj ngjyrave verdh e zi do të kujtohen nga të gjithë në familjen tonë. Emri i tij do të mbetet me shkronja të arta për brezat e ardhshëm, falë përfundimit me sukses të rikonstruksionit të stadiumit “Hristo Botev”, duke e shndërruar atë në impiantin sportiv më modern në Bullgari.” Këtë deklaratë e bëri drejtuesi i klubit të futbollit pas atentatit ndaj pronarit të tij, Ilijan Filipov.

Redaktoi: Diana Cankova

Përgatiti në shqip: Svetllana Dimitrova