Presidenti Rumen Radev: Bullgaria mbështet fort Shqipërinë në rrugën e saj evropiane

Bullgaria konfirmon mbështetjen e vazhdueshme për rrugën evropiane të Shqipërisë dhe gatishmërinë për të ndarë përvojën për të përshpejtuar integrimin e plotë të vendit. Kështu deklaroi presidenti Rumen Radev gjatë vizitës së kreut të shtetit shqiptar Bajram Begaj, i cili ndodhet për një vizitë zyrtare në vendin tonë. Para mediave, Radev theksoi se Shqipëria gjatë dy viteve të fundit është spikatur si një vend lider në Ballkanin Perëndimor sa i përket reformave dhe përpjekjeve të saj për integrim evropian. U theksua se të dy vendet ndajnë një vizion të përbashkët për zhvillimin e rajonit, bazuar në parimet evropiane të fqinjësisë së mirë dhe bashkëpunimit. Radev tha se Bullgaria mirëpret mënyrën se si Shqipëria po ecën në rrugën drejt BE-së, duke respektuar të drejtat e njeriut dhe pa diskriminim ndaj minoriteteve. Kreu i shtetit bullgar shprehu vlerësimin e tij për kushtet e krijuara nga autoritetet shqiptare që qytetarët e Shqipërisë me vetëdije bullgare të mund të shprehin lirisht identitetin, kulturën dhe traditat e tyre bullgare.

Të dy presidentët u shprehën kategorik në mbështetjen e tyre për ndërtimin e përshpejtuar të Korridorit Nr. 8 dhe rolin strategjik të projektit – pjesë e rrjetit të zgjeruar të transportit trans-evropian, jo vetëm për dy vendet tona, por edhe për të gjithë rajonin.