Holanda hoqi veton për anëtarësimin e plotë të Bullgarisë në Shengen

Holanda më në fund hoqi të gjitha pengesat për hyrjen e plotë të Bullgarisë në Shengen. Një javë më parë, qeveria e kryeministrit Mark Rutte vendosi që Bullgaria përmbushë të gjitha kërkesat për këtë dhe i dërgoi një letër parlamentit. Deputetët kishin tri opsione - të mbështesin vendimin, ta refuzojnë ose të mos e marrin në konsideratë, që do të thotë marrëveshje e plotë me veprimet e kabinetit. Gjatë debatit parlamentar, u prezantua një rezolutë nga partia e Kontratës së Re Sociale - aktualisht forca e katërt në Holandë. Ajo mbështet qëndrimin e Austrisë që Sofja të pranohet në Shengen gradualisht dhe fillimisht vetëm nga ajri. Propozimi mblodhi 59 vota "pro" dhe 49 "kundër". Edhe pse mbështetësit e pranimit të pjesshëm mbizotëruan, propozimi u refuzua sepse nuk mblodhi shumicën e nevojshme absolute prej 76 votash. Partia Popullore për Liri dhe Demokraci e Mark Rutte votoi "pro". Çuditërisht, Partia e Lirisë e ekstremit të djathtë, e cila fitoi më shumë vota në zgjedhjet parlamentare të një muaji më parë, nuk votoi. Kështu, Austria mbetet e vetmja pengesë për hyrjen e plotë të Bullgarisë dhe Rumanisë në Shengen, raporton korrespondentja e BNR në Bruksel, Angelina Piskova.