Instituti Francez feston 35 vjetorin e "Mëngjesit me Mitterrand"

Më 19 janar 1989, vetëm disa muaj para rënies së regjimit komunist në Bullgari, presidenti francez i rizgjedhur së fundmi, François Mitterrand, u takua në ambasadën franceze në Sofje me një grup intelektualësh bullgarë nga rrethet disidente, mes të cilëve ishin presidenti i ardhshëm Zhelju Zhelev, poetesha dhe nënpresidentja e ardhshme Bllaga Dimitrova dhe satiristi Radoj Ralin. Më vonë atë ditë, Mitterrand zhvilloi një diskutim edhe me studentët e Universitetit të Sofjes, toni i lirë të të cilëve u vu në dukje nga mediat franceze. Vizita e presidentit francez ishte pjesë e një sërë vizitash që ai po bënte në Bllokun Lindor.

Me rastin e përvjetorit të takimit me intelektualët disidentë bullgarë, i cili hyri në histori si “Mëngjesi me Mitterrand”, Instituti Francez organizoi mbrëmjen e 18 janarit një konferencë dhe diskutim me temë “E kaluara dhe e ardhmja e disidentëve: 35 vjet pas mëngjesit me Presidentin François Mitterrand" me pjesëmarrjen e filozofit dhe eseistit francez Michel Elchaninoff, autor i disa monografive mbi ideologjitë moderne dhe historinë e ideve, dhe të gazetares bullgare Koprinka Çervenkova, një nga pjesëmarrëset në takimin me Mitterrand.