Brendo, i cili kërkohet me një urdhër-arresti evropian, u dorëzua në polici

Mëngjesin e sotëm në polici u dorëzua Evelin Banev-Brendo, i shpallur në kërkim ndërkombëtar, njofton Ministria e Punëve të Brendshme (MPB). Ai u zhduk pasi mori një dënim efektiv me gjashtë vjet për pastrim parash.

Në vitin 2018, Evelin Banev u shpall person në kërkim kombëtar dhe më pas për të u lëshua një urdhër arresti evropian. Krahas burgut në vendin tonë, Brendo përballet me dhjetë vjet burg për trafik droge në Rumani, ndërsa në Itali - 20 vjet burg sërish për drogën në aferën “Mbretërit e Kokainës”.

Emri i Evelin Banev u dëgjua për herë të fundit në fund të vitit të kaluar për një çështje me prokurë të përgatitur në bashkinë e fshatit Tllaçene në rajonin e qytetit Vraca në maj të vitit 2022. Edhe atëherë u ndërmorën veprime operative për të sqaruar nëse ai ka qenë personalisht i pranishëm gjatë vërtetimit të dokumentit nga nënkryetari.

Në një konferencë për shtypin, drejtori i Drejtorisë së Përgjithshme të Policisë Kombëtare, Atanas Illkov, deklaroi se MPB po fillon hetimin se si Brendo arriti të hyjë në Bullgari. “Vendet e burgimit janë një vend i mirë për t'u fshehur, në mënyrë që të mos i arrijnë armiqtë me të cilët ka marrëdhënie të pazgjidhur. Megjithatë, për momentin nuk mund të themi nëse kjo është arsyeja e kthimit të tij”,  komentoi ai.