Artikull

Bullgaria në fotografi:

Vera e nxehtë në Pomorie ka shije kripe

Enjte 29 Gusht 2024 16:15

Enjte, 29 Gusht 2024, 16:15

FOTO: Gergana Mançeva

Madhësia e shkronjave

Moti i thatë dhe i nxehtë nuk është në favor të fermerëve, por po ndihmon punëtorët që nxjerrin kripë në brigjet e Detit të Zi. Nxjerrja e kripës është një nga aktivitetet më të vjetra të njerëzve në qytetin detar Pomorie (Bullgaria Juglindore) - kriporet e Pomories kanë ekzistuar që nga shekulli i 5-të para erës sonë. Kripa është nxjerrë nga kriporet e Pomories deri në vitin 1951. Për transportimin e kripës është ndërtuar një linjë e veçantë hekurudhore Burgas - Pomorie.

Në Pomorie, deri një shekull më parë, kripën e nxirrte çdo familje peshkatarësh në qytet, të cilët e përdornin atë për ruajtjen e peshkut, si dhe për tregti.

Për shkak të ndryshimeve të shkaktuara nga pandemia Covid, kompania e fundit për prodhime kripe në Pomorie e ndërpreu punën. Në sfondin e rritjes së çmimeve të energjisë elektrike, nxjerrja e kripës rezulton të jetë një biznes me humbje. Aktualisht, kriporet e vetme që funksionojnë në qytetin bregdetar janë pjesë e Muzeut të Kripës në Pomorie.

Ai është një nga njëqind objektet turistike kombëtare në Bullgari dhe është gjithashtu i vetmi muze i specializuar i kripës në Evropën Lindore.

FOTO: Gergana Mançeva

Kelevetoja kryen funksionin e një pompe uji. Me ndihmën e një kali vihej në lëvizje cilindri në formë turbine, kur uji nga liqeni nuk mund të arrinte në kripore përmes rrjedhjes natyrore gravitacionale

FOTO: Gergana Mançeva

Koha më e mirë për të mbledhur kripë nga kriporet në Pomorie janë ditët e nxehta të verës, kur një pikë shiu nuk bie për një muaj - kështu thotë drejtori i muzeut Ilija Kusev në fjalimin e tij për vizitorët.

Ilija Kusev

FOTO: Gergana Mançeva

Prej tij kuptojmë se Pomorie ka prodhuar gjithmonë kripën më të mirë, madje edhe më ushqyese në Ballkan, e ndoshta edhe në Evropë. Madje sulltanët turq kanë porositur kripën e Pomories për t'ua bërë ushqimin më të shijshëm.

FOTO: Gergana Mançeva

Danço është një kripar trashëgimtar (nga brezi në brez) nga Pomorie

FOTO: Gergana Mançeva

E veçanta e kriporeve të vetme muzeale të mbijetuara në Pomorie është se uji i kripur nxirret direkt nga Liqeni i Pomories. Vendi është shumë i vizituar, veçanërisht gjatë muajve të ngrohtë të verës.

FOTO: Gergana Mançeva

Një tjetër burim i vlefshëm i liqenit të kripur në Pomorie është balta shëruese. E gjithë kjo, e kombinuar me natyrën e bukur, qytetin e rrethuar me plazhe, ajrin e pastër dhe shpirtin e ruajtur autentik të peshkimit të qytetit, e bën Pomorie një vend tërheqës për njerëzit me prirje për turizmin kulturor.

FOTO: Gergana Mançeva

Pomorie – një qytezë me histori të pasur, ku njeriu i premton vetes se do të kthehet përsëri

Përpiloi: Gergana Mançeva

Foto: Gergana Mançeva

Përgatiti në shqip dhe publikoi: Vesella Mançeva

Publikoi / Publikuan: БНР екип