Radosllava Nedjalkova nga "Nashenci": Ansamblet folklorike janë zemrat e komuniteteve bullgare në mbarë botën

Çmimi u dha për herë të 12-të nga Agjencia Ekzekutive për Bullgarët Jashtë Shtetit (IABCH) dhe nderon bashkatdhetarët që promovojnë kulturën, gjuhën dhe traditat bullgare dhe aktivitetet e tyre nuk janë të kufizuara brenda një vendi. Në këtë mënyrë, IABCH drejton vëmendjen tek përpjekjet e këtyre grave bullgare, të cilat jo vetëm janë përshtatur me sukses në një vend të huaj, por edhe kanë arritur të mbajnë gjallë frymën bullgare dhe të bashkojnë komunitetet tona emigrante.

Të nominuara për çmimin "Bullgarja e Vitit" për vitin 2023 ishin 24 zonja të nderuara nga 19 vende - edukatore, drejtuese të ansambleve folklorike, themeluese të bibliotekave dhe shoqatave kulturore, mbrojtëse të gjuhës bullgare. Ndër emrat e ndritur që marrin çmimin pas vdekjes së tyre janë Galina Todorova nga Instituti i Kulturës në Republikën Çeke dhe Ganna Todorova, e cila ia kushtoi gjithë jetën e saj ruajtjes së çdo gjëje bullgare në komunitetet tona në Ukrainë dhe Moldavi.

Agjencia për Bullgarët Jashtë Shtetit nderoi Nevenka Kostadinovën nga Bosilegradi i Serbisë me çmimin - "Bullgarja e preferuar e publikut". Ky çmim i jepet zonjës Kostadinova për punën e saj të palodhshme për të ruajtur bullgarët si komunitet në qytetin e vogël të Bosilegradit. Ajo së bashku me familjen e saj punëson më shumë se 100 persona në punishten e saj të zdrukthtarisë. “Një bullgare ka sukses dhe fuqi po aq sa ka edhe mbështetje nga familja” – thotë Nevenka Kostadinova.

"Unë jam një grua për të cilën fati vendosi të lindë jashtë kufijve të Bullgarisë. Kur je larg atdheut, çdo gjë bullgare është shumë më e bukur dhe më e afërt me ty. Misioni im dhe i familjes sime është t'u jap mundësi njerëzve që të qëndrojnë, të mos ikin nga vendlindja e tyre, të qëndrojnë pranë vatrave të tyre, sepse sipas meje, nuk ka asgjë më të mirë se kjo!

Ikonën e Shën Zllata Mëglenska, të pikturuar me dorë nga Antonia Stankova, e mori fituesja e re e çmimit "Bullgarja e Vitit" për vitin 2023, Radosllava Nedjallkova. Ceremonia u zhvillua më 18 tetor - ditën e caktuar nga kisha për të nderuar shenjtoren Zllata Mëglenska, e zgjedhur si mbrojtësja qiellore e bullgarëve jashtë vendit.

"Ikona e Shën Zllata Mëglenska do të udhëtojë mijëra kilometra, duke mbartur një grimcë të ndjenjës se distanca nuk ndryshon ndjenjën e përkatësisë, identitetit bullgar dhe vetëdijen e bashkatdhetarëve tanë jashtë Bullgarisë," theksoi nënpresidentja Ilijana Jotova në urimin e saj drejtuar pjesëmarrësve, nën patronazhin e së cilës zhvillohet konkursi i IABCH-së.

"Nuk e dija se ekzistonte një nder kaq i madh" - ndau Radosllava Nedjallkova nga Milano për Radio Bullgarinë dhe e përshkroi çmimin "Bullgarja e Vitit" që iu dha në këtë mënyrë:

"Ky çmim është një përgjegjësi e madhe, të cilën unë do ta vendos në një vend të dukshëm - do të më japë forcë për çdo gjë që bëj, për të vazhduar ta bëj atë me më shumë zell. Grupet folklorike janë zemrat e shumicës prej komuniteteve bullgare në mbarë botën. Dikush shkon në kishën bullgare atje, pastaj kërkon grupin e vallëzimit - kur është jashtë vendit, kërkon të ndjejë Bullgarinë, dhe çfarë më mirë se sa ta ndjejë atë përmes valleve popullore, përmes bashkatdhetarëve tanë që janë atje, që flasin për vendin tonë, që bëjnë verore së bashku. Prandaj është kaq e lehtë për këto grupe të jenë të bashkuara dhe të mbajnë kontakte. Fillimi i kontakteve tona daton në vitin 2016, kur filluam të flisnim për shoqatën tonë e cila tashmë po bën disa vite që është aktive, por në atë kohë ishte vetëm një ëndërr. Të bashkoheshim, të ishim bashkë, të ndanim problemet tona, sepse gjërat që bëjmë jashtë kanë shumë të përbashkëta."

Foto: IABCH; BTA; Krasimir Martinov

Përgatiti në shqip dhe publikoi: Kostandina Bello