Sektori turistik kërkon zgjidhje për problemin e mungesës së kuadrove

Kriza e kuadrove në sektorin turistik ka arritur nivele kritike, dhe sipas të dhënave të ndryshme deri në 70% të objekteve turistike punojnë me staf të paplotësuar. Humbjet ekonomike nga potenciali turistik i parealizuar përllogariten në rreth 1 miliard leva në vit (500 milionë euro). Në kërkim të një zgjidhjeje për problemin, Shoqata Bullgare e Hoteleve organizon sot në Sofje një tryezë të rrumbullakët me temën "Mungesa e kuadrove në turizëm: njerëz, zgjidhje, e ardhme". Do të paraqiten modele të ndryshme për sigurimin e punësimit gjatë gjithë vitit për kuadrot, të bazuara në praktika të suksesshme nga tregje të tjera.

Ndër temat e tjera të rëndësishme që do të diskutohen janë mundësitë për lehtësimin e regjimit të vizave për turistë dhe punëtorë, rikthimi i pozicioneve të humbura në tregjet tradicionale pas pandemisë, zhvillimi i tregjeve të reja si Turqia, Uzbekistani, Kosova, Skandinavia dhe Spanja, përmirësimi i infrastrukturës për zgjatjen e sezonit.

"Partnerët ndërkombëtarë kërkojnë garanci për stabilitetin e shërbimit, dhe paaftësia për ta siguruar këtë mund të çojë në humbjen e pozicioneve në treg. Prandaj ne, nga Shoqata Bullgare e Hoteleve, besojmë se vetëm përmes përpjekjeve të përbashkëta të të gjitha palëve të interesuara mund të garantohet që turizmi bullgar të vazhdojë të jetë konkurrues në tregun ndërkombëtar", deklaroi Veselin Danev, kryetar i Këshillit Drejtues të Shoqatës Bullgare të Hoteleve.