Ligj i ri rregullon tregun e kriptoaktiveve në Bullgari

Parlamenti miratoi në lexim të dytë Ligjin për Tregjet e Kriptoaktiveve, me propozues Këshillin e Ministrave. Me këtë ligj rregullohet tregtimi i këtij lloji instrumentesh dhe mbikëqyrja e sektorit në përputhje me rregulloret evropiane, njoftoi gazetarja Maria Fileva. Ligji i jep të drejta Komisionit për Mbikëqyrje Financiare dhe Bankës Popullore Bullgare të mbikëqyrin licencimin dhe aktivitetet e pjesëmarrësve në këtë treg.

Opozita kundërshtoi mundësinë e parashikuar që Komisioni për Mbikëqyrje Financiare (KMF) jo vetëm të vendosë gjoba financiare, por edhe të bllokojë faqe interneti nëse vlerëson se ka shkelje. Shkak për kundërshtimet u bë fakti që para leximit të dytë u hoq teksti që parashikonte urdhër të gjykatës pas kërkesës së komisionit.

“Pse po hiqni kontrollin gjyqësor dhe po i jepni të drejtë KMF-së që sipas vlerësimit të saj, pa vendim gjyqësor, të hyjë në çdo kompani dhe të vendosë kufizime që mund të shndërrohen në censurë dhe të kenë pasoja shumë të pafavorshme dhe dëme?”, kritikoi Martin Dimitrov nga PP-DB.