Po përgatitet një program për tërheqjen e punëtorëve bullgarë nga jashtë

Nga vjeshta, Ministria e Punës dhe Politikës Sociale do të nisë një program për tërheqjen e bullgarëve që jetojnë jashtë vendit. Programi “Zgjedh Bullgarinë” do të financohet me mbi 33 milionë euro, njofton 24çasa.bg. Qëllimi është të tërhiqen profesionistë nga diaspora, pasi bizneset kanë nevojë për rreth 260 000 punonjës. Programi do të nxisë gjithashtu edhe migrimin e brendshëm drejt vendbanimeve të vogla. Programi përfshin një paketë mbështetëse, ku përfshihet ndihmë për zhvendosjen e mobilieve, si dhe shtesë për akomodim në rastet kur i kthyerit fillon punë në një vend ku nuk ka banesë personale. Për ata që nuk flasin gjuhën bullgare, do të ofrohet kurs gjuhësor. Gjithashtu planifikohet një shtesë ditore për transport deri në vendin e punës nga 1 deri në 3.5 euro. Për të kompensuar të ardhurat më të ulëta në Bullgari në krahasim me vendet e tjera, parashikohen pagesa stimuluese shtesë.

Programi do të zbatohet nga Agjencia e Punësimit dhe Agjencia Ekzekutive për Bullgarët Jashtë Vendit, e cila do të krijojë edhe një Portal Kombëtar Informativ për programin. Do të ketë edhe fushata informuese në vendet me komunitete historike bullgare.

Sipas të dhënave të Eurostat-it, Bullgaria është në vendin e tretë në BE për nga numri i qytetarëve që jetojnë në vende të tjera të Bashkimit.  Këta janë 753 000 persona, ose 11,68% e popullsisë së vendit tonë.