RADIO BULLGARIA

KULTURË

Reportazh

Festat unike të operës dhe baletit në Stara Zagora fillojnë më 21 nëntor

Radio Bullgaria në gjuhën shqipe

Mërkurë, 19 Nëntor 2025, 20:00

Festat unike të operës dhe baletit në Stara Zagora fillojnë më 21 nëntor

FOTO: Opera Shtetërore - Stara Zagora

Madhësia e shkronjave

Një nga ngjarjet më të rëndësishme në hartën kulturore të Bullgarisë – Festivali i artit operistik dhe baletik në Stara Zagora, fillon tradicionalisht me premierën e mikpritësve nga Opera e Stara Zagorës. Më 21 dhe 22 nëntor, trupa e parë operistike jashtë kryeqytetit në vendin tonë, për herë të parë në historinë e saj njëqindvjeçare, do të paraqesë “André Chénier” – veprën që e shndërroi Umberto Giordanon në kompozitor të famshëm. Regjisori i shfaqjes është Ognjan Draganov, dirigjent – i njohuri botëror Pavell Balev, i cili me këtë spektakël debuton në skenën e Operës Shtetërore – Stara Zagora.

FOTO: Opera Shtetërore - Stara Zagora

Në rolet kryesore publiku do të ketë kënaqësinë të shohë dhe dëgjojë yje të ndritshëm të skenës sonë operistike, mes të cilëve vezullojnë Tanja Ivanova dhe Kirill Manollov.

FOTO: Opera Shtetërore - Stara Zagora


Programi festiv vazhdon me “Liqeni i mjellmave” – spektakël i rëndësishëm i baletit të Operës së Stara Zagorës.


Koncerti “Erë e re në operë” përfshin vepra të përgatitura posaçërisht për ansambël frymor me orkestër. Ai do të drejtohet nga fagotisti Gabor Meszaros – profesor në Konservatorin e Zvicrës Italiane në Lugano Music University “Conservatorio della Svizzera italiana” in Lugano. 

FOTO: Opera Shtetërore - Stara Zagora

Kori i Operës Shtetërore – Stara Zagora do të shënojë 150-vjetorin e lindjes së kompozitorit të madh bullgar Dobri Hristov me një koncert nën dirigjimin e prof. Mirosllav Popsavov.

FOTO: Opera Shtetërore - Stara Zagora

Shfaqja e parë mysafire është më 29 nëntor dhe kjo është premiera e mrekullueshme e parë për Bullgarinë e “Rusallka”-s nga Antonín Dvořák, të cilën Opera Shtetërore – Varna e paraqiti gjatë verës. Pason pjesëmarrja festive e Operës Shtetërore – Plovdiv me “Flautin Magjik” të Mozart-it – shfaqja e parë operistike e regjisores së njohur teatrale Diana Dobreva.

Filharmonia e Sofjes merr pjesë në festime me një program simfonik elegant, të drejtuar nga Ivo Venkov – profesor në Konservatorin Mbretëror Flaman në Antwerpen. Teatri Muzikor Kombëtar “Stefan Makedonski” është i ftuar të paraqesë koncert-spektaklin e krijuar posaçërisht “Mbreti i Valsit”, i dedikuar 200-vjetorit të lindjes së Johann Strauss-it të ri.

FOTO: Opera Shtetërore - Stara Zagora

Finalja e festivalit është më 7 dhjetor me titullin më të ri të Wagner-it në repertorin e teatrit tonë kombëtar të operës – “Tannhäuser”. Me këtë shfaqje u hap Festivali Wagnerian i Operës së Sofjes gjatë verës së vitit 2025.

Këtë edicion të festimeve unike në vendin tonë për artet muzikore-skenike parashikohet një program i pasur paralel: vlefshmërimi i një pullë postare të veçantë, e dedikuar jubileut njëqindvjeçar të teatrit të operës në Stara Zagora; ekspozita foto-dokumentare “100 vite në 100 korniza”; konferenca shkencore “Opera dhe qyteti”; ekspozitë e dedikuar 150-vjetorit të lindjes së Dobri Hristov; prezantimi i “Kronikës së Filharmonisë së Sofjes” nga dr. Andrej Andreev. Finalin e ngjarjeve shoqëruese e vendos akad. Pllamen Kartalov, i cili më 5 dhjetor paraqet studimin e tij interesant autorial “Opera dhe natyra”.


Gjatë vitit 2025, Festivali i artit operistik dhe baletik është i dedikuar 100-vjetorit të krijimit të operës së vetme jashtë kryeqytetit që ka ekzistuar pa ndërprerje. Themeluesit e saj janë të frymëzuar nga dashuria për artin e madh. Sot Opera e Stara Zagorës impresionon me arritje artistike, shënon etapa në kulturën tonë kombëtare, merr pjesë aktivisht në formimin e pamjes së Stara Zagorës si qendër ekonomike në zhvillim dhe vend tërheqës për jetë dhe turizëm kulturor.


Redaktoi: Cvetana Tonçeva

Përgatiti në shqip: Sindi Nikollofski

Foto: Opera Shtetërore – Stara Zagora

Publikoi / Publikuan: Sindi Nikollofski