Kryebashkiaku i Varnës mbetet në arrest, eurodeputetët kërkojnë sanksione kundër Bullgarisë

Pas një seance që zgjati disa orë, Gjykata e Apelit e Sofjes e la në paraburgim për një kohë të pacaktuar Kryebashkiakun e Varnës, Bllagomir Kocev. Gjykatësi Stefan Iliev shpjegoi se ekziston një supozim i arsyeshëm se Kocev ka kryer krimet për të cilat akuzohet. Ai shtoi se nuk ka rrezik që i akuzuari të arratiset nëse vendoset një masë më e lehtë, por ekziston rreziku që ai të kryejë një krim tjetër sepse ai është ende kryebashkiak i Varnës. Vendimi i gjykatës është përfundimtar.

Eurodeputetët nga grupi "Rinovo Evropën" kanë kërkuar që Komisioni Evropian të pezullojë pagesat për Bullgarinë për shkak të arrestimit të kryebashkiakut të Varnës, i cili i përket partisë së tyre, raportoi “Politico”. Kryetarja e grupit liberal në Parlamentin Evropian, Valerie Aye, i dërgoi një letër Komisionit Evropian, duke deklaruar se qeveria bullgare po përdor Komisionin e pavarur Antikorrupsion për qëllime politike.

Sipas Aye, Komisioni Antikorrupsion është shndërruar në një mjet për presion mbi figurat e opozitës. Sipas saj, kjo minon garancitë e përcaktuara në Planin e Rimëkëmbjes për pavarësinë e institucioneve. Kjo vjen në një kohë kur Komisioni po shqyrton kërkesën e Bullgarisë për pagimin e një kësti të ri prej 653 milionë eurosh në kuadër të Instrumentit të Rimëkëmbjes dhe Qëndrueshmërisë.