Nderojmë festën e fuqive të ndritshme qiellore – Dita e Kryeengjëllit

Më 8 nëntor shënojmë festën e tërë ushtrisë qiellore, të njohur në kalendarin kishtar si Kuvendi i shenjtit kryeengjëll Mikael, i vendosur në shekullin IV në Sinodin e Laodikesë. Sipas traditës kishtare, kryeengjëlli Mikael udhëheq tërë ushtrinë engjëllore në luftën kundër forcave të errësirës dhe gjatë Ardhjes së Dytë të Birit të Zotit do të vijë në tokë me forcat qiellore.

Në Zbulesën e shën Gjon Teologut tregohet për betejën e shenjtit kryeengjëll Mikael dhe luftëtarëve të tij me Dragoin me shtatë koka, i quajtur gjithashtu Djall dhe Satan. Ikonografia ortodokse e paraqet në këtë skenë kryeengjëllin Mikael me një shtizë në njërën dorë, duke shkelur djallin, të cilin engjëjt e përzunë në tokë.

Për çdo person në Pagëzimin e Shenjtë i jepet një engjëll rojtar, i cili e shoqëron gjatë gjithë jetës si ndihmës shpirtëror dhe udhëzues, dhe e mbron nga të këqijat dhe ndikimet e liga. Prandaj besimtarët e krishterë drejtojnë lutje në mëngjes dhe në mbrëmje tek mbrojtësi i tyre qiellor që t’i udhëheqë drejt veprave të mira dhe t’i mbrojë nga fatkeqësi të papritura.

Populli ynë beson se kur vjen ora e fundit e rrugëtimit tokësor të shpirtit, vetë kryeengjëlli Mikael zbret për ta ndarë atë nga trupi dhe për këtë arsye Dita e Kryeengjëllit lidhet me nderimin ndaj të vdekurve dhe shpirtit të njeriut.

Kisha jonë e shënon ditën me Liturgji të Shenjtë festive në nder të udhëheqësit të forcave qiellore dhe tërë ushtrisë engjëllore.