Rast i radhës i mizorisë ndaj një kafshe mobilizon energjinë qytetare

Rasti i fundit i sjelljes çnjerëzore ndaj një kafshe, i njohur si “incidenti me qenin Maja”, si edhe disa të ngjashëm gjatë muajve të fundit, janë pasqyrë e moralit shoqëror – theksoi në një intervistë për Radio Bullgarinë psikologu social doc. Nikollaj Dimitrov.

“E mira, nëse mund të quaj diçka të mirë në këto raste, është se si pasojë ato zbulojnë se në Bullgari po formohet një lloj i ri ndjeshmërie kolektive – empatia ndaj kafshëve si pjesë e moralit njerëzor në përgjithësi. Shoqëria nuk qëndron pasive dhe jo vetëm që dënon, por e ripërkufizon identitetin e vet përmes reagimit ndaj rasteve të tilla. Raste të tilla nuk janë thjesht raste kriminale, por, do të guxoja të thoja, edhe teste etike për pjekurinë e ndërgjegjes kolektive.”

Ai vuri në dukje kontrastin e fortë psikologjik që provokon profesioni i autorit – në këtë rast, ai është mjek.

Psikologu mendon se reagimi shoqëror në këtë rast është i justifikuar dhe logjik:

“Mizoria ndaj kafshëve perceptohet si shkelje e kodit dhe rendit moral dhe e vetë idesë për njerëzi. Protesta kolektive dhe dënimi publik janë mekanizma shoqërorë për rivendosjen e ekuilibrit moral.”

Çdo formë dhune, pavarësisht nëse ndaj njerëzve apo ndaj kafshëve, duhet të ndëshkohet dhe të pengohet – ky është pozicioni kategorik i Animal Rescue, organizatë joqeveritare që kujdeset për kafshët e pastreha. Ja si e shohin njerëzit që i marrin, i socializojnë, i sterilizojnë dhe u gjejnë shtëpi të reja katërkëmbëshave të gjetur në rrugë, rastet e sjelljes çnjerëzore ndaj tyre:

“E vërteta është se kafshët e pastreha bëhen viktima jashtëzakonisht të lehta të dhunës, sepse rrallë kontrollohet ku është dhe cila është përkatësisht kafsha – shpjegon bashkëthemeluesja e Animal Rescue, Nadezhda Stançeva. – Prej 15 vitesh përsërisim të njëjtën mantrë në intervista, artikuj dhe grupe pune, që shteti duhet të kontrollojë kafshët shtëpiake dhe tregtinë me to. Është e detyrueshme çipizimi i çdo qeni, por nuk do të ketë rezultat derisa shteti të fillojë ta kontrollojë dhe, nëse nuk zbatohet, të ndëshkojë – ky është një ligj që mbështetet në vullnetin e mirë të njerëzve. Nëse çdo qen i blerë në një dyqan zoologjik regjistrohet në emër të pronarit të tij, nesër, kur ai të gjendet në rrugë, do të ketë kush të gjobitet, por ky person me siguri do të mendojë nëse do të hedhë qenin e ardhshëm.”

Në Bullgari ekziston Policia për Kafshët, por sipas Nadezhda Stançeva kjo strukturë ekziston vetëm në dokumente dhe nuk funksionon në mënyrë efektive për rastet e dhunës ndaj kafshëve:

Nadezhda Stançeva sinjalizon edhe për një problem tjetër që ekziston prej shumë kohësh, i lidhur me llojin tjetër më të përhapur të kafshëve shtëpiake – macet.

“Nuk ka një bazë të dhënash të unifikuar për mikroçipet që vendosen te macet, pra edhe nëse e çipizojmë një mace, ai numër nuk çon askund. Ky është problem, sepse edhe pse është e detyrueshme që macja të jetë e çipizuar, për shembull për të udhëtuar me pronarin e saj, si dhe gjatë blerjes apo adoptimit, ky çip nuk jep asnjë informacion. Baza e vetme e të dhënave “VetIS” është ndërtuar nga Agjencia Bullgare për Sigurinë Ushqimore, por në të figurojnë kuajt, delet, dhitë, qentë, por jo macet. Prandaj edhe pronarët përgjegjës që duan të regjistrojnë macen e tyre, nuk mund ta bëjnë.”

Informacioni për çdo çipizim të bërë te një mace ruhet në letër. Në Sofje megjithatë janë të regjistruara dhe funksionojnë mbi 200 klinika veterinare, dhe nëse një person dëshiron të kontrollojë se kujt i përket macja që ka gjetur, nuk mund t’i vizitojë të gjitha dhe të presë ndihmë për këtë.