Në rrugën për në Antarktidë u zhvillua një stërvitje kundër piratëve

Anija kërkimore “Shenjtor Kirill dhe Metodij” zhvilloi stërvitje me të shtëna gjatë kalimit në një zonë të rrezikshme pranë Afrikës, teksa ishte në rrugëtim drejt Antarktidës. Lundrimi është pjesë e mbështetjes logjistike për ekspeditën e 34-t antarktike bullgare, njoftoi faqja e internetit e Akademisë së Lartë të Marinës “Nikolla Jonkov Vapcarov”.

Ekuipazhi u vu në gatishmëri të lartë luftarake. Masa u mor për shkak të kalimit në ujëra me rrezik të lartë nga sulmet pirate. Gjatë stërvitjes dhe të shtënave u praktikua zmbrapsja e një sulmi me barka të shpejta – një taktikë e përdorur shpesh nga grupet pirate në rajon. Komanda e anijes sqaroi se stërvitja është pjesë e aktiviteteve të planifikuara paraprakisht për mbrojtjen e ekuipazhit, anijes dhe ngarkesës së transportuar për bazën kërkimore bullgare në ishullin Livingston.

Redaktoi: Ivo Ivanov

Përgatiti në shqip: Svetllana Dimitrova

Foto: Аrmymedia.bg