Ngjarjet me adresë ballkanike

Radio Bullgaria në gjuhën shqipe

Shtunë 29 Nëntor 2025 09:00

Shtunë, 29 Nëntor 2025, 09:00

FOTO: nova.rs

Madhësia e shkronjave

Sanksionet e SHBA-së teknologjikisht ndaluan rafinerinë e vetme serbe të naftës

Rafineria e vetme serbe e naftës NIS në Pançevë, pranë Beogradit, nuk ka lëndë të parë dhe është para ndalimit, njoftoi presidenti Aleksandër Vuçiç në televizionin kombëtar RTS.

Beogradi u dha pronarëve rusë 50 ditë që të shesin pjesën e tyre shumicë prej 56% në NIS. Rafineria është nën sanksionet amerikane nga 9 tetori dhe nga 1 dhjetori të këtij viti bankat serbe ndalojnë të punojnë me të. Janë nën kërcënim vendet e punës të 13 000 personave. NIS njoftoi se më 19 nëntor ka kërkuar nga SHBA një licencë të re për punë, ndërsa vazhdojnë negociatat me aksionarët për ndryshim të pronësisë.

Sipas televizionit N1 ndalimi i rafinerisë, e cila plotëson rreth 80% të tregut serb, do të thotë se nafta dhe benzina tashmë do të duhet të importohen nga Hungaria, Rumania, Bullgaria dhe Maqedonia e Veriut.

FOTO: DPA

Shkupi shpalli plan për të tërhequr diasporën e vet mbrapsht në vend

Për shkak të rritjes së numrit të qytetarëve të Maqedonisë së Veriut, të cilët jetojnë jashtë, qeveria në Shkup përgatiti Strategjinë Kombëtare për bashkëpunim me diasporën 2025–2030. Ministri i Jashtëm Timço Mucunskі paraqiti projektin.

Programi i posaçëm qeveritar do të reintegrojë njerëzit që duan të kthehen. Parashikohet që në komunat të ketë “persona lidhës”, të cilët do të veprojnë si urë midis diasporës dhe organeve shtetërore qendrore, dhe qeveria do të mund të emërojë edhe “të dërguar të posaçëm për diasporën”.

Sipas statistikës zyrtare mbi 700 000 janë qytetarët e Maqedonisë së Veriut jashtë vendit. 38,4% janë në shtete në Evropë. Bashkësitë më të mëdha jashtë BE-së janë në Australi, SHBA dhe Kanada. Transferimet monetare nga emigrantët formojnë midis 4 dhe 10% të PBB-së së Maqedonisë së Veriut, transmeton Deutsche Welle.

FOTO: Pixabay

Greqia do t’i paraqesë Shqipërisë plan për negociata dypalëshe në rrugën drejt BE-së

Greqia përgatit një hartë të re diplomatike për marrëdhëniet e veta me Shqipërinë. Pritet që ministri i jashtëm Yorgos Gerapetritis t’i paraqesë planin zyrtar të veprimit homologes së tij të re shqiptare Elisa Spiropali gjatë vizitës së saj të parë zyrtare në Athinë më 16 dhjetor. Greqia dëshiron të rinovojë dialogun dypalësh pas rizgjedhjes për kryeministër të Edi Ramës dhe deklarimit të tij të ri që Shqipëria të hyjë në BE deri më 2030, ndërsa vetë negociatat të përfundojnë gjatë presidencës greke të Këshillit të BE-së në vitin 2027.

Harta parashikon punë mbi temat e ndjeshme, të cilat prej vitesh mbeten të hapura – lidhjen kufitare, bashkëpunimin në infrastrukturë dhe energjetikë dhe mosmarrëveshjen e pazgjidhur për kufirin detar në Detin Jon, transmeton BGNES.

FOTO: Facebook/Europe House Kosovo

BE është investitori i huaj më i madh në Kosovë

Ambasadori i BE-së në Kosovë Aivo Orav deklaroi se nga viti 1999 bashkësia evropiane ka investuar 3,7 miliardë euro në shtetin ballkanik. Diplomati njoftoi statistikat në hapjen në Prishtinë më 24 nëntor të ekspozitës fotografike “BE në anën tuaj”. Ekspozita tregon se si mbështetja evropiane ndikon mbi përditshmërinë e njerëzve në Kosovë, shkruan faqja telegrafi.com.

Për një çerek shekulli me këto 3,7 miliardë euro të investuara në Kosovë, BE mbetet partneri më i fortë dhe i besueshëm i vendit, si dhe burimi më i madh i ndihmës financiare, tha Orav dhe theksoi se mbështetja e BE-së për Kosovën vazhdon.

FOTO: dnevnik.hr

Nga një sfidë në TikTok i vunë zjarr një godine simbol në Zagreb – do ta shembin

Ngritësja e lartë simbolike “Vjesnik” në kryeqytetin kroat Zagreb, e cila u dogj nga brenda më 18 nëntor, do të shembet, njoftoi zëvendëskryeministri dhe ministri i ndërtimit Branko Baçiç. Më së shumti ka gjasa që kjo të bëhet përmes shpërthimit.

Godina në bulevardin qendror “Slavonskoj” u ndez si sfidë e publikuar në rrjetin social TikTok nga dy të rinj 18-vjeçarë, të cilët janë ndaluar. Për fat të mirë, gjatë fatkeqësisë së shkaktuar në godinën e lartë nuk ka pasur njerëz të tjerë, transmeton televizioni shtetëror hrt.hr.

Përpiloi: Ivo Ivanov

Përgatiti në shqip: Sindi Nikollofski

Publikoi / Publikuan: Sindi Nikollofski