Piktura në stacione autobusi na kujtojnë të mos humbasim lidhjen me botën e egër

Pamje të kafshëve të egra dhe luleve “gjallëruan” stacionet e autobusëve në komunat Momçillgrad, Çernooçene dhe Ivajllovgrad. Këto skena natyrore u pikturuan nga artisti Vencisllav Josifov–Xhermejn, me idenë e fondacionit “Rodopet më të egra”.

“Në Rodopet Lindore, natyra e egër është ruajtur në një formë mjaft të pastër”, tregon piktori në një intervistë për Radion Kombëtare Bullgare – Kërxhali. Çdo stacion është pikturuar me zogj, kafshë dhe bimë të ndryshme, tipike për zonën përkatëse – bizonë, shqiponja egjiptiane, lejlekë të zinj e të bardhë, breshkë, dre i kuq, ketra tokësor, orkide të egra. “Duke i parë, njerëzit do të kujtohen çdo ditë se njeriu dhe natyra janë një e tërë”, thotë autori i pikturave natyrore. Ai shton se, ndërsa punonte në stacionin në fshatin Nanovica ku pikturonte dre, i bënin shoqëri dre dhe sorkadhe të vërtetë, të cilët shëtisnin të qetë rreth 50 metra larg njerëzve.

• Rrethi i Jetës: Si Rodopet Lindore u bënë një model për një ekosistem të rimëkëmbur

“Përpiqem sa më shpesh të dal në natyrën e egër, sepse ajo ma rikthen shpresën se mund të jetojmë në më shumë harmoni me kafshët përreth nesh”, thotë Vencisllav Josifov.

Përpjekjet e tij për ta afruar natyrën e egër me jetën e përditshme të njerëzve në vendbanime kanë sjellë krijimin e shumë vizatimeve të bukura në mure pallatesh dhe shkollash në qytetet e mëdha. Përmes muraleve të tij gjigante, Vencisllav Josifov dëshiron të na kujtojë sa e rëndësishme është të mos humbasim lidhjen me natyrën dhe të kërkojmë të bukurën rreth nesh.

Redaktoi: Gergana Mançeva

Përgatiti në shqip: Svetllana Dimitrova