U ngrit flamuri i anijes së re patrulluese “Hrabri”

Sot është një ditë historike për Forcat tona Detare, sepse pas më shumë se 100 vjetësh, për herë të parë në Bullgari prodhohet një anije luftarake e re nga industria jonë e mbrojtjes. Këtë e tha ministri i mbrojtjes, Atanas Zaprjanov, gjatë një ceremonie solemne për ngritjen e flamurit detar të Bullgarisë mbi anijen e re patrulluese shumëfunksionale modulare “Hrabri”, njoftoi Ministria e Mbrojtjes.

Zaprjanov ishte kategorik se mbrojtja e ujërave territoriale dhe e zonës ekonomike të Bullgarisë në Detin e Zi mund të garantohet pikërisht me anije si “Hrabri” dhe me personelin e Forcave Detare, i cili i përkushtoi jetën shërbimit të Atdheut.

“Hrabri” është anija e parë nga dy anijet shumëfunksionale modulare patrulluese sipas projektit “Blerja e një anijeje shumëfunksionale modulare patrulluese për Forcat Detare”. Fillimi i ndërtimit të saj u bë më 3 dhjetor 2021 me një ceremoni zyrtare në zonën e Fabrikës për Riparim dhe Ndërtim Anijesh “MTG-Delfin”.

Redaktoi: Miglena Ivanova

Përgatiti në shqip: Svetllana Dimitrova