Një protestë në Sofje mbështeti plotësisht votimin me makina

Mijëra qytetarë protestuan mbrëmë në të ashtuquajturin “trekëndëshi ipushtetit” në Sofje, duke kërkuar zgjedhje të ndershme dhe numërim 100% automatik të rezultateve të zgjedhjeve. Demonstrata u organizua nga koalicioni “Po e Vazhdojmë Ndryshimin – Bullgaria Demokratike”.

“Ka një ndryshim të madh midis futjes së teknologjisë së re zgjedhore, e cila, sigurisht, nuk duhet të bëhet në minutën e fundit, dhe rikthimit te një sistem që funksionoi për vite me radhë në zgjedhje të njëpasnjëshme. Ky sistem është shumë më i sigurt, më kuptimplote dhe gëzon mbështetje më të gjerë”, tha bashkëkryetari i “Bullgarisë Demokratike” Bozhidar Bozhanov. Ai e krahasoi situatën aktuale me përdorimin paralel të makinave dhe fletëve të votimit, duke e cilësuar këtë si një zgjidhje të keqe, pasi makinat shërbejnë praktikisht si printera dhe në fund fletët numërohen nga njerëzit.

Lidhur me mbledhjen e anuluar të Komisionit parlamentar për Çështje Kushtetuese dhe Ligjore më herët gjatë ditës, e cila duhej të diskutonte futjen e votimit plotësisht me makina, deputeti e interpretoi këtë si një shenjë se deputetët kanë frikë nga njerëzit në shesh. 

Bashkëkryetari tjetër i “Bullgarisë Demokratike” Ivajllo Mirçev komentoi fjalët e liderit të GERB-it, Bojko Borisov, publikimi i të cilit përkoi me fillimin e protestës, se ai mbështet votimin me “makina skanimi” për të përjashtuar faktorin njerëzor, por nëse nuk ka kohë të mjaftueshme për këtë, është mirë të përdoret varianti aktual me makina dhe fletë letre: “Bojko Borisov është një mashtrues politik dhe do ta bëjë atë që i thotë Deljan Peevski. Ai nuk ka mendim të pavarur.” Kryetari i “Po e Vazhdojmë Ndryshimin”, Asen Vasilev, gjithashtu u deklarua në favor të mbrojtjes së votës dhe u bëri thirrje njerëzve të votojnë për njerëz që nuk vjedhin.

Gjatë protestës, në fasadën e ndërtesës së Presidencës u projektua mbishkrimi: “Mafia nuk i pëlqen makinat”.

 

Redaktoi: Diana Cankova

Përgatiti në shqip: Vesella Mançeva