Kontingjent ushtarak bullgar u përcoll me ceremoni drejt Kosovës

Sot, më 29 janar, në Pleven u zhvillua një ceremoni solemne për përcjelljen e një formacioni ushtarak të Forcave të Armatosura të Republikës së Bullgarisë për pjesëmarrje në batalionin shumëkombësh të Komandës Rajonale “Perëndim”, pjesë e Forcave Stabilizuese të NATO-s në Kosovë. Në ceremoni morën pjesë përfaqësues të udhëheqjes politike dhe ushtarake të Ministrisë së Mbrojtjes, si dhe përfaqësues të pushtetit vendor dhe atij shtetëror.

“Pjesëmarrja në operacionin e Forcave Stabilizuese të NATO-s në Kosovë është një detyrë me përgjegjësi të lartë dhe me rëndësi për paqen dhe sigurinë në rajonin e Ballkanit Perëndimor. Kjo është një detyrë që mbështet drejtpërdrejt interesat tona, si dhe paqen dhe sigurinë ndërkombëtare”, tha në fjalinë e tij përshëndetëse zëvendësministri i mbrojtjes, Radostin Iliev.

“Në KFOR marrin pjesë 33 shtete, ndërsa Bullgaria është ndër 10 vendet e para për nga kontributi në mision, si me personel ashtu edhe me detyrat e kryera. Çdo kontingjent gjatë 26 viteve të fundit ka rritur autoritetin e vendit tonë. Ne, ushtarakët bullgarë, e dëshmojmë profesionalizmin tonë duke respektuar rreptësishtë rregullat për përdorimin e forcës dhe procedurat standarde operative. Punojmë për rritjen e ndërveprueshmërisë operative me aleatët, me të cilët jemi krah për krah në këtë mision”, theksoi zëvendësshefi i mbrojtjes, gjeneral-toger Krasimir Kënev.

Redaktoi: Miglena Ivanov

Përgatiti në shqip: Svetllana Dimitrova