Ngjarjet me adresë ballkanike

Ministri i parë i jashtëm i Turqisë nuk u përgjigj nëse vendi duhet të ketë bombë bërthamore

 

Ministri i Jashtëm turk, Hakan Fidan, refuzoi të përgjigjej drejtpërdrejt nëse Ankaraja duhet të krijojë programin e saj për armë bërthamore. Më 9 shkurt, në një intervistë për CNN TURK, Fidan theksoi se ndryshimet në doktrinën e sigurisë së SHBA‑së dhe mundësia që SHBA të heqë mburojën e saj bërthamore për aleatët tradicionalë, mund të çojnë në shfaqjen e shteteve të reja bërthamore, përfshirë edhe në Evropë.

Moderatori i intervistës, Ahmet Hakan, e pyeti: “A duhet Turqia të ketë armë bërthamore?” Fidan mbeti i heshtur dhe pas një pauze të sikletshme, moderatori i sugjeroi: “Mund të thoni: ‘Pa koment’.” Pasi sërish nuk pati reagim, moderatori e mbylli temën me fjalët: “Mirë, po vazhdoj më tej.” Intervista është publikuar edhe në faqen zyrtare të Ministrisë së Jashtme të Turqisë.

Sërish mbyllet seksioni rumun i “Evropës së Lirë”

 

Seksioni rumun i “Evropës së Lirë”, i financuar nga Kongresi i SHBA‑së, do të mbyllet zyrtarisht më 31 mars, njofton romania.europalibera.org. Portali digi24.ro shton se së shpejti do të mbyllet edhe seksioni bullgar.

Botimi rumun ka rreth 20 punonjës dhe është pasardhës i radios që transmetonte në Rumani gjatë komunizmit dhe deri në vitin 2008. Në vitin 2018, pas rritjes së dezinformimit mediatik, “Evropa e Lirë” u rikthye në Rumani. Media realizoi shumë investigime dhe në tetor 2025 ishte ndër më të cituarat në vend. Në mars 2025, presidenti Donald Trump ndërpreu financimin për Agjencinë e SHBA për Mediat Globale (USAGM) dhe nisi mbylljen e seksioneve të mediave amerikane në Evropë.

Prokuroria në Hagë kërkon nga 45 vjet burg për komandantët e UÇK‑së

 

Kryeprokurorja Kimberly West pranë Gjykatës Speciale për Kosovën në Hagë kërkoi nga 45 vjet heqje lirie për komandantët e Ushtrisë Çlirimtare të Kosovës (UÇK) – Hashim Thaçi, Kadri Veseli, Rexhep Selimi dhe Jakup Krasniqi. Ata akuzohen për krime lufte dhe krime kundër njerëzimit gjatë viteve 1998–1999.

Avokatët e Thaçit, ish‑kryeministër, ish‑ministër i jashtëm dhe ish‑president i Kosovës, 57‑vjeçar, deklaruan se ai është i pafajshëm dhe se nuk ka pasur kontroll real mbi UÇK‑në dhe komandantët e saj gjatë kryengritjes kundër Beogradit.

Sipas mbrojtjes, pretendimet e prokurorisë se Thaçi dhe komandantët e tjerë kanë ndërmarrë një fushatë të dhunshme për të marrë pushtetin politik në Kosovë janë një përpjekje e pabazë për të rishkruar historinë. Ish‑komandantët e UÇK‑së ndodhen në burg në Hagë që nga nëntori i vitit 2020.

 

Presidenti serb kërkon që vendi të eksportojë miliona shishe verë në Kinë

 

Presidenti Aleksandër Vuçiq deklaroi se nuk do të ketë shpëtim për industrinë serbe të verës nëse ajo nuk fillon të eksportojë nga 15 deri në 30 milionë shishe në vit drejt Kinës, njofton RTS.

Në Lozhionicë, gjatë paraqitjes së masave të reja financiare në ndihmë të prodhuesve të verës, prodhuesve të birës dhe distilerive, Vuçiq tha: “Duhet të sigurojmë sa më shumë eksport drejt Kinës dhe atëherë industria e verës do të mbijetojë.” Ai shtoi se prodhimi i verës në Evropë po bie dhe se evropianët po shkurtojnë gjithnjë e më shumë sipërfaqet me vreshta, ndërsa marrëveshja e tregtisë së lirë e Serbisë me Pekinin hap mundësi të reja.

“Para tre vitesh taksa doganore për verën ishte 30%, në vitin 2026 do të jetë 12%. Vitin tjetër do të jetë 6%, ndërsa në vitin 2028 – zero, kështu që do të kemi përparësi,” shpjegoi presidenti.

Diaspora kroate do të ketë festën e saj në atdhe

 

Qeveria e Kroacisë ka propozuar organizimin çdo vit të “Javës së kroatëve që jetojnë jashtë vendit”. Ajo do të zhvillohet gjatë javës së fundit të majit, duke u përputhur me Ditën e Shtetësisë – 30 maj, njofton hina.hr.

Iniciativa synon rritjen e dukshmërisë së kroatëve jashtë vendit në shoqërinë kroate dhe forcimin e lidhjeve me ta. Java do të përfshijë një sërë aktivitetesh të organizuara nga shoqatat e kroatëve jashtë vendit, si edhe nga institucione shtetërore, shoqërore, kulturore dhe akademike.

Sipas të dhënave të qeverisë, rreth 3,2 milionë kroatë dhe pasardhës të tyre jetojnë jashtë vendit. Komunitetet më të mëdha janë në SHBA – 1,2 milionë, në Gjermani – 500 mijë, në Argjentinë – 300 mijë, dhe në Australi e Kanada – nga 250 mijë secila.

 

Përpiloi: Ivo Ivanov

Përgatiti në shqip: Vesella Mançeva