Peshëngritësi Karlos Nasar sërish është sportisti më i mirë i Bullgarisë

Për vitin e dytë radhazi, kampioni olimpik, botëror dhe evropian në ngritje peshe Karlos Nasar fitoi çmimin “Sportisti i vitit”. Pas tij u renditën shpresa e re e volejbollit Aleksandër Nikollov dhe skiatori Allbert Popov.

Dhjetëshen e plotësuan snoubordisti Tervell Zamfirov, piloti i automobilizmit Nikolla Collov, volejbollisti Simeon Nikollov, tenisti Ivan Ivanov, gjimnastja Stilijana Nikollova, atleti Bozhidar Sarëbojukov dhe basketbollisti Aleksandër Vezenkov. 

Ekipi i vitit u shpall kombëtarja e volejbollit për meshkuj, e cila fitoi medaljen e argjendtë në Kampionatin Botëror në Filipine. Trajneri i tyre, Gianlorenzo Blengini, u vlerësua si trajneri më i mirë.

“Ceremoni e shkëlqyer, një përzierje gëzimi, lotësh dhe buzëqeshjesh, dhe një urim për shumë suksese për sportistët bullgarë. Në vitet e fundit ata na bënë bullgarë krenarë dhe na bënë të besojmë në sportin bullgar, bënë që shumë njerëz në mbarë botën të flasin për ta. Të rinjtë nga e gjithë bota i imitojnë. Ne duhet t’u krijojmë kushte”, deklaroi në ceremoni Presidentja Ilijana Jotova, e cila i dorëzoi çmimin sportistit numër 1 të Bullgarisë.

 

Redaktoi: Diana Cankova

Përgatiti në shqip: Vesella Mançeva