Kryeministri diskutoi sigurinë energjetike me udhëheqës evropianë në Paris

Kryeministri në detyrë, Andrej Gjurov, mori pjesë në Takimin e Dytë të Nivelit të Lartë për Energjinë Bërthamore, i cili po zhvillohet në Paris. Në kuadër të forumit ai zhvilloi një sërë takimesh me udhëheqës evropianë, ku u diskutuan siguria energjetike, fondet evropiane dhe stabiliteti rajonal.

Në një bisedë me kryetaren e Komisionit Evropian, Ursula fon der Lajen, Gjurov tha se qeveria në detyrë po punon në mënyrë aktive për zbatimin e masave të Planit për Rimëkëmbje dhe Qëndrueshmëri, me qëllim përgatitjen e kërkesës për pagesën e katërt nga programi.

Me homologun e tij grek, Kiriakos Micotakis, Gjurov diskutoi sigurinë rajonale dhe masat kundër rritjes së çmimeve të karburanteve për shkak të tensioneve në Lindjen e Mesme. Gjurov e falënderoi Greqinë për gatishmërinë për ndihmë në fushën e mbrojtjes ajrore.

Gjatë një takimi të udhëheqësve evropianë të organizuar nga Emanuel Makron, kryeministri bullgar theksoi rëndësinë e zhvillimit të rrjeteve të energjisë elektrike dhe rëndësinë strategjike të energjisë bërthamore. Ai tha se Bullgaria planifikon ndërtimin e kapaciteteve të reja bërthamore me reaktorë AP1000 dhe po shqyrton mundësitë për reaktorë modularë të vegjël.

Redaktoi: Miglena Ivanova

Përgatiti në shqip: Svetllana Dimitrova