Parlamenti miratoi përfundimisht zgjatjen e dytë të buxhetit

Parlamenti miratoi përfundimisht ligjin e dytë të zgjatjes, i cili duhet të jetë në fuqi deri në miratimin e buxhetit të rregullt për vitin 2026. Debati më i madh në sallën plenare u përqendrua te shpenzimet e bashkive. Pushteti lokal do të ketë mundësinë të përdorë të ardhurat e veta – për shembull, ato të mbledhura nga taksat lokale – si edhe të shfrytëzojë mjetet e pashpenzuara të bartura nga buxheti i vitit të kaluar, njofton BGNES.

Me ligjin e zgjatjes i jepet mundësi shtetit të marrë hua për të marrë pjesë në prokurimet e përbashkëta evropiane për industrinë e mbrojtjes. U miratua gjithashtu mundësia që shteti të garantojë marrëveshje huaje të “Bulgartransgaz” në një vlerë totale prej rreth 92 milionë eurosh, të lidhura me realizimin e Korridorit Vertikal të Gazit, i cili lidh Bullgarinë, Greqinë, Rumaninë, Hungarinë, Sllovakinë, Ukrainën dhe Moldavinë, deri në miratimin e buxhetit të rregullt.

“Ligji i zgjatjes” miratohet kur parlamenti nuk ka aprovuar me kohë buxhetin vjetor të shtetit. Ky ligj i përkohshëm i lejon qeverisë të vazhdojë financimin e funksioneve bazë shtetërore deri në miratimin e buxhetit të rregullt, duke mundësuar shpenzimin e mjeteve kryesisht mbi bazën e buxhetit të vitit të kaluar.

 

Redaktoi: Miglena Ivanova

Përgatiti në shqip: Vesella Mançeva