“Policia Kufitare” mori teknikë të re për mbi 10 mln euro

Policia kufitare bullgare mori pajisje të reja me vlerë mbi 10 milionë euro, në kuadër të programit evropian për menaxhimin e kufijve për periudhën 2021–2027, njoftoi Ministria e Brendshme. “Bullgaria dhe policia kufitare bullgare vlerësohen nga partnerët tanë ndërkombëtarë si një shembull i mirë për Evropën,” theksoi Anton Zllatanov, drejtor i Drejtorisë së Përgjithshme të Policisë Kufitare.

Ndër pajisjet e reja përfshihen 30 automjete me kalueshmëri të lartë për transportimin e qenve të shërbimit, 5 autobusë për punonjës në turne dhe 4 automjete të specializuara për transportimin e të ndaluarve. U dorëzuan gjithashtu 187 kamera termike dore me rreze të afërt dhe 24 me rreze të largët, që do të zëvendësojnë pajisjet e përdorura që nga vitet 2006–2008.

Në mbikëqyrjen kufitare do të përfshihen edhe 3 sisteme pa pilot me gjithsej 6 dronë. Pajisjet do të përdoren kryesisht në kufirin bullgaro-turk dhe bullgaro-serb për zbulimin e hershëm të kalimeve të paligjshme.

Redaktoi: Miglena Ivanova

Përgatiti në shqip: Svetllana Dimitrova