Bullgaria kërkon që Maqedonia e Veriut të përmbushë angazhimet e marra

Organizatat e komunitetit bullgar në Maqedoninë e Veriut kanë shpërndarë një letër zyrtare me kundërshtime ndaj projektit të rishikuar të Planit të Veprimit për mbrojtjen e të drejtave të personave që u përkasin pakicave dhe komuniteteve në ish‑republikën jugosllave.

Ky Plan Veprimi është dokument bazë, pjesë e Konsensusit Evropian të vitit 2022, dhe zbatimi i tij do të monitorohet gjatë gjithë procesit negociues për anëtarësimin e ardhshëm të Maqedonisë së Veriut në BE.

Në qëndrimin e tyre, bullgarët deklarojnë se dokumenti vazhdon të mos adresojë problemet thelbësore me të cilat përballet komuniteti bullgar në Maqedoninë e Veriut. Ndër to janë: presion institucional sistematik, zbatim i pabarabartë i ligjeve, kufizime të rënda ndaj vetëpërcaktimit dhe lirisë së shoqërimit, mungesë mbrojtjeje kundër diskriminimit dhe krime urrejtjeje të sponsorizuara politikisht.

Ministria e Jashtme bullgare mbështet kërkesat legjitime të komunitetit bullgar në Maqedoninë e Veriut dhe u bën thirrje autoriteteve në Shkup të marrin parasysh kërkesat e qytetarëve të tyre dhe të përmbushin të gjitha angazhimet e marra ndaj BE‑së dhe ndaj Bullgarisë, thuhet në qëndrimin zyrtar të ministrisë. 

 

Redaktoi: Ivo Ivanov

Përgatiti në shqip: Vesella Mançeva