Projekt për kompleks modern universitar dhe qendër hi-tech në Vidin

Bashkia e Vidinit po përgatit një projekt për një kompleks modern universitar dhe një qendër ballkanike hi-tech – njofton BTA, duke cituar kryetarin e bashkisë Cvetan Cenkov.

Drejtuesit e bashkisë kanë vendosur si qëllim ta shndërrojnë Vidinin në një qendër kryesore arsimore dhe ekonomike në Bullgari dhe tashmë po tërheqin në mënyrë aktive punonjës të rinj. Masa konkrete mbështetëse janë të orientuara drejt specialistëve të ardhshëm në fushën e mjekësisë dhe inxhinierisë së ndërtimit.

Para pak ditësh në qytet u zhvillua edicioni i këtij viti i Panorama e Arsimit të Lartë, ku morën pjesë mbi 20 institucione të arsimit të lartë nga e gjithë vendi. Organizatorët theksojnë se interesi për ngjarjen rritet çdo vit, gjë që dëshmon nevojën për kontakt të drejtpërdrejtë midis komunitetit akademik dhe studentëve të ardhshëm.

Në hapjen e forumit, kryebashkiaku i Vidinit, Cvetan Cenkov, theksoi se kompleksi i ri universitar dhe teknologjik i avancuar në Bullgarinë Veriperëndimore do të ndërtohet sipas standardeve bashkëkohore botërore, për t’iu përgjigjur tregut të punës dhe kërkesave të brezave të ardhshëm.

Përpiloi: Cvetana Tonçeva

Përgatiti në shqip: Kostandina Bello