Kryetarja e Kuvendit Popullor Mihaella Docova: Të rikthejmë shtetin ligjor

Mihaella Docova nga partia fituese e zgjedhjeve, “Bullgaria Progresive”, u zgjodh kryetare e Kuvendit Popullor të 52‑të. 

“Sfida para nesh është të rikthejmë praktikat e mira të legjislacionit bullgar, ta bëjmë procesin të parashikueshëm dhe jo të nxituar dhe ai të bazohet në debat, jo në formalizëm procedural”, deklaroi Docova nga foltorja e parlamentit. Ajo shtoi se legjislacioni duhet të mbështetet në vlerësimin e ndikimit dhe jo të bëhet “copë‑copë”. 

Kryetarja e re e Kuvendit theksoi se deputetët duhet të udhëhiqen në veprimtarinë ligjvënëse nga qëndrueshmëria e vendimeve, e jo nga rrethanat e momentit. 

“Sot, më shumë se kurrë, Bullgaria ka nevojë jo vetëm për qeverisje të qëndrueshme, por edhe për shërimin e shtetësisë”, tha Mihaella Docova. Sipas saj, jemi sërish të vendosur përballë provës për të rikthyer dhe forcuar shtetin ligjor dhe të pavarur. 

Mihaella Docova është 42 vjeçe, juriste me përvojë në administratën shtetërore dhe pushtetin ligjvënës. Ajo ka punuar në Ministrinë e Mjedisit dhe Ujërave, në Kuvendin Popullor dhe në Administratën Rajonale të Qarkut të Sofjes.

Redaktoi: Diana Cankova

Përgatiti në shqip: Vesella Mançeva