Nuk ka plane për të rivendosur shërbimin e detyrueshëm ushtarak

Rivendosja e shërbimit të detyrueshëm ushtarak nuk është në axhendë, tha për BNR-në zëvendësministri i mbrojtjes në detyrë Jordan Bozhillov. "Ende kemi probleme me rekrutimin e njerëzve, dhe pajisjet duhet të menaxhohen nga njerëz të aftë dhe të arsimuar. Kemi një numër të vogël kandidatësh për shërbim në ushtri, rreth 20% e disa strukturave kanë vende të lira. Shumë nga kandidatët braktisin shërbimin ushtarak për arsye fizike", pranoi Bozhillov.

Sfidat kryesore me të cilat përballet Ushtria Bullgare janë ruajtja e aftësive ekzistuese, mbikëqyrja intensive, kryerja e patrullave, gatishmëria për reagim dhe zotërimi i platformave të reja, tha për BNR-në shefi i Mbrojtjes, Admirali Emill Eftimov, gjatë festimeve të 6 majit në Sofje.

"Po mendojmë për mbikëqyrjen satelitore. Dronët kanë qenë në Ushtrinë Bullgare që nga viti 2020. Ne punojmë me kompani bullgare - testojmë si gjatë ushtrimeve, ashtu edhe në terrene speciale stërvitore, mbështetemi te përvoja nga NATO, Ukraina dhe BE", tha Admirali Eftimov.

 

Redaktoi: Ivo Ivanov

Përgatiti në shqip: Vesella Mançeva