Radio Kërxhali i BNR-së feston 10-vjetorin

Përveçse njihet si Dita e Evropës, data 9 maj ka një domethënie të veçantë edhe për BNR-në. Pikërisht më 9 maj 2016, familja e madhe e radios sonë u zgjerua me një anëtar të ri. Stacioni i nëntë rajonal i BNR-së në Kërxhali – “Zëri i Rodopeve” – u dëgjua për herë të parë në eter.

Në ceremoninë e hapjes së Radios Kërxhali, atëherë morën pjesë edhe kolegët tanë nga programet në gjuhën turke të Radio Bullgarisë. Ata përgatitën transmetimin e parë drejtpërdrejt në gjuhën bullgare dhe turke, ndërsa të ftuar ishin mikpritësit – ekipi i Radios Kërxhali, përfaqësues të pushtetit vendor dhe të biznesit, personalitete publike, shkrimtarë, si dhe këngëtarë vendas të këngëve popullore turke dhe bullgare.

Gjatë 10 viteve të fundit, emisionet në gjuhën turke, që transmetohen çdo ditë në orën 08:00, 13:00 dhe 20:00, janë ndër programet më të ndjekura të radios rajonale në Kërxhali. Këtë e dëshmojnë si sondazhet sociologjike, ashtu edhe interesi me të cilin janë pritur ndër vite kolegët e ekipit të “Gjuhës Turke” të Radio Bullgarisë gjatë transmetimeve të realizuara në terren – në studion e Radios Kërxhali, në sheshin e fshatit Kirkovo, si edhe në qendër të qytetit Ardino. Të ashtuquajturat transmetime të drejtpërdrejta të Radio Bullgarisë krijuan hapësirë për prezantimin e shumë përfaqësuesve të pushtetit vendor, shkrimtarëve dhe poetëve nga Bullgaria dhe Turqia, talenteve të reja të muzikës bullgare dhe turke, si edhe dëgjuesve nga rajoni. Takimet u pritën me shumë entuziazëm dhe interes, për çka ju falënderojmë!

Bashkëpunimi mes ekipeve të Radio Bullgarisë dhe Radio Kërxhalit është produktiv edhe në një drejtim tjetër – informacioni i përgatitur nga ekipi në Kërxhali është një pjesë e rëndësishme edhe e transmetimeve në gjuhën turke. Shpesh ai gjen vend edhe në publikimet e 9 programeve të tjera në gjuhë të huaj të programit ndërkombëtar të BNR-së – Radio Bullgaria.

U urojmë kolegëve të Radio Kërxhalit të vazhdojnë edhe më tej të mbrojnë me po aq shkëlqim misionin publik dhe autoritetin e radios kombëtare në Bullgarinë Jugore! Dhe ta mbushin moton e tyre – “Zëri i Rodopeve” – me tingëllim, përmbajtje dhe forcë!

Përgatiti në shqip: Svetllana Dimitrova