Burgasi ka potencialin të shndërrohet në një qendër për taksi ajrore

Burgasi ka potencialin të shndërrohet në një qendër për taksi ajrore, dronë transportues dhe mjete të tjera fluturuese pa pilot. Këtë e deklaroi kryetari i Shoqatës së Industrisë Aeronautike Bullgare (ABAI), Todor Ivanxhikov, gjatë edicionit të pestë të Forumit Ndërkombëtar për Lidhshmërinë e Transportit Ajror dhe Turizmin në Burgas, raportoi BTA. Sipas Ivanxhikovit, qyteti ka një sërë përparësish për zhvillimin e lëvizshmërisë ajrore urbane – një sektor që përfshin taksi ajrore, dronë transportues dhe sisteme të tjera pa pilot. Ai njoftoi se disa muaj më parë Shoqata e Industrisë Aeronautike Bullgare i dërgoi një letër kryetarit të bashkisë së Burgasit, Dimitar Nikollov, në të cilën propozohet që ish-aeroporti ushtarak Ravnec të shfrytëzohet si një qendër testimi për mjete fluturuese pa pilot. Sipas tij, afërsia e Burgasit me detin përbën një avantazh të rëndësishëm, pasi mundëson teste në një mjedis real, larg bregut dhe me një shkallë më të lartë sigurie.

Redaktoi: Miglena Ivanova

Përgatiti në shqip: Svetllana Dimitrova