Bullgaria ka tre marrëveshje për ndërtimin e qendrave të të dhënave

Ka tre marrëveshje të dakorduara për ndërtimin e qendrave të të dhënave në territorin e Bullgarisë. Këtë e njoftoi mbrëmë Tomisllav Donçev nga “GERB‑SDS” në forumin “AI në Bullgari: Nga rregullimi drejt aplikimeve reale dhe ndikimit” në Sofje, njofton BTA. 

Ngjarja u organizua nga fondacioni “Konrad Adenauer” në Bullgari dhe Shoqata Bullgare e Sipërmarrësve (BESCO) në partneritet me Institutin për Politikë Ekonomike dhe Dhomën Industriale‑Tregtare Gjermano‑Bullgare. 

Një nga memorandumet është me kompaninë gjermane “Schwarz Digits”, njoftoi Donçev, pa përmendur emrat e kompanive të tjera, duke sqaruar vetëm se bëhet fjalë për një kompani të dytë të madhe gjermane dhe një kompani shumë të madhe amerikane. 

Sipas tij, dy nga tre projektet janë realiste për t’u zbatuar, pasi “jo të gjithë janë konkurrues”. Donçev shtoi se ekziston një lidhje e mundshme midis projektit për centralin bërthamor “Belene” dhe qendrave të ardhshme të të dhënave për shkak të sasisë së madhe të energjisë elektrike që konsumojnë këto objekte.

 

Redaktoi: Miglena Ivanova

Përgatiti në shqip: Vesella Mançeva