Nga Rodopet në Vatikan me zërin e Diana Dafova në “Haberlea”

Filmi dokumentar HABERLEA, kushtuar këngëtares dhe kompozitores bullgare Diana Dafova, do të ketë një shfaqje speciale më 28 maj në kinemanë Kino Lumiere në Pallatin Kombëtar të Kulturës. E njohur për ndërthurjen e folklorit, etnos dhe muzikës botërore, Dafova frymëzohet nga Rodopet – mali i lidhur me Orfeun mitik. Zëri i saj arrin deri në Kozmos – “Adia” e saj është kënga e dytë bullgare që ka fluturuar në hapësirë në bordin e anijes kozmike Space Shuttle Columbia, me ftesë personale nga drejtori i NASA-s David Dickinson.

Filmi i regjisores Petja Angellova nuk ndjek stilin klasik biografik, por ndërthur kinemanë dokumentare me elemente artistike dhe simbolikë të fortë vizuale. Titulli vjen nga Haberlea rhodopensis – lulja e Orfeut, e njohur për aftësinë e saj të “ringjallet” pas tharjes. Ajo shndërrohet në metaforë për qëndrueshmërinë shpirtërore dhe aftësinë e njeriut për të kaluar përmes vështirësive.

Xhirimet i çojnë shikuesit në disa nga vendet më mbresëlënëse në Bullgari, Itali dhe Turqi – nga pylli mistik Krëstova Gora dhe Stamboll deri te Bazilika e Shën Pjetrit në Vatikan. Ekipi tregon për një seri rastësish të pashpjegueshme gjatë xhirimeve – shi i rrëmbyeshëm dhe mjegull e dendur tërhiqeshin papritur pikërisht para fillimit të skenave të rëndësishme, ndërsa në vende me kufizime të rrepta kamerat arrinin të filmonin në momentin e fundit të mundshëm. Sipas producentëve, ndjesia ishte sikur “diçka i udhëhiqte” gjatë gjithë procesit të xhirimit.

Përpiloi: Elena Karkallanova

Përgatiti në shqip: Sindi Nikollofski