Konflikti në Ukrainë nuk do të zgjidhet në fushën e betejës

Bullgaria dhe Mbretëria e Bashkuar po forcojnë bashkëpunimin industrial në fushën e mbrojtjes. Këtë e njoftoi sot Ministria e Mbrojtjes pas takimit të Ministrit të Mbrojtjes, Dimitër Stojanov, me Stephen Doughty, Ministër për Evropën, Amerikën e Veriut dhe territoret përtej detit në Ministrinë e Punëve të Jashtme, Bashkësisë Britanike dhe Zhvillimit të Mbretërisë së Bashkuar. “Mbretëria e Bashkuar është një aleat i rëndësishëm i Bullgarisë në NATO dhe një partner kyç ynë në Evropë. Ne kemi mundësi të shkëlqyera për bashkëpunim si në fushën e mbrojtjes dhe përgatitjes, ashtu edhe në linjën e bashkëpunimit industrial”, tha Stojanov. Ai theksoi se ndërmarrjet bullgare të mbrojtjes punojnë me sukses me kompani britanike dhe se ekziston potencial i konsiderueshëm për zgjerimin e partneritetit. Sipas tij, industria bullgare e mbrojtjes është në proces modernizimi të përshpejtuar dhe po integrohet gjithnjë e më aktivisht me standardet e NATO-s. 

Sa i përket luftës në Ukrainë, Stojanov deklaroi: “Ne jemi të bindur se konflikti nuk do të zgjidhet në fushën e betejës. Po shohim se gjithnjë e më shumë krerë shtetesh nga BE-ja po fillojnë të flasin për uljen në tryezën e negociatave. Duhet të mendojmë për njerëzit në front, sepse këto janë fate njerëzore.” Nga ana e tij, Ministri Doughty vuri në dukje se Mbretëria e Bashkuar gjithashtu mbështet përpjekjet diplomatike, por deri tani Rusia vazhdon të përshkallëzojë sulmet e saj kundër Ukrainës.

 

Redaktoi: Miglena Ivanova

Përgatiti në shqip: Vesella Mançeva