Protestë pas shoqërimit të kryebashkiakut të Kërxhalit për marrje në pyetje

Kryetari i Bashkisë së Kërxhalit, Erol Mymyn, dhe nënkryetar i partisë DPS, është shoqëruar për marrje në pyetje në polici, njoftoi qendra e shtypit e Bashkisë së Kërxhalit. Televizioni Kombëtar Bullgar (BNT) raportoi se kryetari i bashkisë po jep dëshmi në një procedim paraprak për vepra penale të kryera nga zyrtarë në përmasa veçanërisht të mëdha. Po kryhen edhe kontrolle në bashki. 

Po mblidhen prova që lidhen me një vepër penale në lidhje me një tender publik me vlerë mbi 5 milion leva. Ka të dhëna se është ushtruar ndikim në zgjedhjen e kompanisë fituese, si edhe se nuk janë kryer të gjitha aktivitetet e parashikuara në kontratë. Këtë e deklaroi Ministri i Brendshëm, Ivan Demerxhiev. “Nëse kryetari i Kërxhalit nuk ka kryer vepra penale apo shkelje ligjore, nuk ka asnjë arsye të shqetësohet”, shtoi ministri dhe kërkoi dorëheqjen e prokurorit të qarkut, Dafin Kamenov, për pengim të veprimeve procedurale. 

Para godinës së Drejtorisë Rajonale të Policisë u mblodhën mbështetës të DPS‑së. Partia e cilësoi arrestimin e kryetarit të bashkisë në ditën e dytë të festës së Kurban Bajramit si shenjë mosrespekti ndaj të gjithë komunitetit turk dhe mysliman në Bullgari.

 

Redaktoi: Ivo Ivanov

Përgatiti në shqip: Vesella Mançeva