Lëvizja e kamionëve drejt Turqisë është e ngarkuar

Trafiku në pikën kufitare “Kapitan Andreevo” është i ngarkuar në dalje për kamionët drejt Turqisë, njoftoi Policia Kufitare. Në pikat dhe kalimet e tjera drejt Greqisë, Maqedonisë së Veriut, Serbisë dhe Rumanisë, lëvizja është normale. Në kalimin kufitar Ruse – Giurgiu vazhdon deri në fund të muajit riparimi kryesor në pjesën bullgare të urës mbi lumin Danub dhe qarkullimi po rregullohet në një korsi. 

Nga 1 deri më 5 qershor, midis orës 8:00 dhe 17:00, për shkak të rifreskimit të vijëzimit rrugor, lëvizja në korsinë aktive do të kufizohet gradualisht në një segment të autostradës “Struma” në dalje të Sofjes – nga km 0 deri në km 10. Trafiku do të devijohet në korsitë e lira, njoftoi Agjencia e Infrastrukturës Rrugore. 

Pritet vendosja e vijëzimit edhe në segmente të rrugës republikane midis Bajllovo – Smollsko, Eleshnica – Elin Pelin – Novi Han.

Pjesë të rrugës Dobriç – Ballçik do të mbyllen gradualisht për qarkullim për shkak të vendosjes së shtresës së fundit të asfaltit. Lëvizja do të ndalet gjatë ditës deri në orën 20:00 dhe do të devijohet në itinerare alternative.

 

Redaktoi: Ivo Ivanov

Përgatiti në shqip: Vesella Mançeva