Burrat mesatarisht marrin 93 euro më shumë pension se gratë

Gati gjysma e pensioneve të reja të dhëna gjatë tremujorit të parë të vitit 2026 janë pensione invaliditeti, tregojnë të dhënat e Institutit Kombëtar të Sigurimeve Shoqërore. Nga janari deri në mars janë dhënë 27 616 pensione të reja. Prej tyre, 13 513, ose 49 për qind, janë pensione të ndryshme invaliditeti. Pjesa tjetër janë pensione për vjetërsi dhe moshë. Tendenca për rritjen e pensioneve të invaliditetit nuk është e re dhe lidhet me ndryshimin e metodikës për përcaktimin e aftësisë së kufizuar të qëndrueshme, e cila është në fuqi që nga viti 2023. 

Masa mesatare e pensioneve bazë për ushtarakët dhe policët është 933,67 euro. Ndërsa masa mesatare e pensioneve për vjetërsi dhe moshë për pjesën tjetër të popullsisë është 494,37 euro, që do të thotë një diferencë prej gati 440 eurosh. Arsyeja për pensionet e larta të ushtarakëve dhe policëve është se tek ata 3 vite shërbim llogariten si 5 vite stazh sigurimi të kategorisë së tretë dhe ata dalin në pension me rreth 45 vite stazh të kësaj kategorie. 

Në Sofje, pensioni mesatar mujor është mbi 633 euro. Pensionet më të ulëta mesatare i marrin të moshuarit në rajonet Razgrad dhe Silistra – 429 euro. Pasojnë rajonet Tërgovishte dhe Kërйгali me pensione mesatare prej 434 dhe 435 euro. 

Burrat mesatarisht marrin 93 euro më shumë pension se gratë. Arsyeja është se ka sektorë të ekonomisë ku pagat janë më të larta dhe ku punojnë më shumë burra, si p.sh. në miniera, polici, ose ushtri. Ndërsa ka fusha me paga më të ulëta ku punojnë më shumë gra, si p.sh. në industrinë e tekstilit. 

Nga 1 korriku pensionet do të indeksohen sipas rregullit zviceran me mbi 7% dhe pensioni minimal për vendin do të arrijë në 347 euro.

Redaktoi: Ivo Ivanov

Përgatiti në shqip: Vesella Mançeva