Dy shkolla bullgare jashtë vendit fituese në konkursin “Objektivi i Nxënësit”

Më 12 qershor do të shpërblehen fituesit e Festivalit të Dytë Kombëtar të Filmit “Objektivi i Nxënësit”. Gara krijuese zhvillohet në tri kategori – film dokumentar, film artistik dhe film i animuar, ndërsa gjithsej në të tri kategoritë kanë marrë pjesë 58 ekipe nga 20 vendbanime.

Ndër ata që paraqitën krijimet e tyre janë edhe tri shkolla bullgare jashtë vendit – fëmijët bullgarë nga qyteti spanjoll i Taragonës morën pjesë me filmin “Sekreti i fundit i apostullit”, nga Parisi – me dokumentarin “Parisi është ky, nuk është lodër”, ndërsa nga Kishinau paraqitën filmin artistik “Çasti i fundit”. Dy nga këto propozime hyjnë në treshen më të mirë të kategorisë së tyre, mësoi Radio Bullgaria nga Ljudmilla Veliçkova-Ivanova, organizatore e konkursit “Objektivi i Nxënësit”.

Vendi i dytë për film artistik i jepet filmit të nxënësve bullgarë nga Moldavia, ndërsa pozita e tretë në kategorinë e kinemasë dokumentare u fitua nga ekipi i shkollës bullgare Shkolla Bullgare Kirill dhe Metodij në kryeqytetin francez.

“Jemi shumë të lumtur! Nxënësit e gjimnazit nga Gjimnazi i Parë Bullgar në Paris kanë fituar vendin e tretë dhe tani po i presim me emocion çmimet më 12 qershor” – ndau për Radio Bullgarinë drejtuesja e shkollës Kamelija Konakçieva-Tribulen, dhe tregoi se si është krijuar vepra dokumentare kushtuar shkrimtarit humorist, piktorit dhe studiuesit të krahinës bullgare Dimitër Çorbaxhijski, i njohur me pseudonimin e tij Çudomir:

“Vitin e kaluar organizuam një forum të madh për Çudomirin dhe na erdhën mysafirë nga Muzeu Letraro-Artistik Muzeu Letraro-Artistik Çudomir nga Kazanllëku. Kishte shumë dhe nga më të ndryshmet veprimtari dhe, në lidhje me qëndrimin e Çudomirit në Paris, nxënësit së bashku me mësuesen e tyre realizuan këtë film shumë interesant duke ndjekur gjurmët e përshtypjeve të tij nga kryeqyteti francez.

Fëmijëve u lindi ideja të filmonin të njëjtat vende sot dhe t’i krahasonin me vizatimet e Çudomirit nga periudha e tij këtu. Rreth kësaj u ndërtua i gjithë filmi i shkurtër, sepse ata realizuan një shëtitje të tërë nëpër Paris.”

Përgatiti në shqip: Sindi Nikollofski