Rafineria “Lukoil Neftohim Burgas” ka një deficit prej 200 milionë eurosh

Administratori i ri i posaçëm i “Lukoil Neftohim Burgas”, Evgeni Simeonov, njoftoi se po përgatitet një analizë e detajuar e gjendjes së rafinerisë dhe shoqërive të tjera të grupit “Lukoil”. Ai bëri të ditur se deficiti për vitin e kaluar është 200 milionë euro. “Qëllimi im kryesor është të garantoj funksionimin e pandërprerë të rafinerisë, furnizimin e rregullt të tregut bullgar me karburante, respektimin strikt të regjimeve të sanksioneve dhe, së bashku me ekipin e “Lukoil”, të mbrojmë interesin bullgar”, deklaroi Simeonov, i cituar nga BNR Horizont.

Do të vendoset një monitorim i vazhdueshëm mbi procesin e prodhimit në rafineri, përfshirë ngarkesën e kapaciteteve, llojet e naftës së përdorur dhe proceset e përzierjes. Nuk parashikohen shkurtime të personelit.

Nuk ka dhe nuk mund të ketë plane për nacionalizimin e “Lukoil” në një vend anëtar të BE‑së, u shpreh kategorikisht Zëvendëskryeministri dhe Ministri i Ekonomisë, Investimeve dhe Industrisë, Aleksandër Pulev, i cituar nga BTA.”

 

Redaktoi: Miglena Ivanova

Përgatiti në shqip: Vesella Mançeva