25 vjet nëpër “Rrugë të Panjohura” me Meri Bojs Bend

Prej një çerek shekulli, Grupi “Meri Bojs Bend” na fton të ecim nëpër “Rrugë të Panjohura” me këngën e tyre të njohur me të njëjtin titull.Së fundmi, grupi e interpretoi këngën më 6 qershor gjatë koncertit të tij të parë në Vjenë.

Për këtë përvojë, vokalistja e grupit, Maria Mutafçieva, tregoi:

"Krijuam marrëdhënie shumë të ngrohta, shumë të sinqerta e krejtësisht njerëzore me njerëz që i takuam për herë të parë. Nuk njihnim askënd, por u ndamë si miq të vërtetë. Madje na kishin përgatitur një program për pothuajse të gjithë javën, po të kishim qëndruar më gjatë."

Meri dhe grupi i saj ndodhen tashmë në Zvicër, ku më 13 qershor do të mbajnë koncertin e tyre të dytë në Cyrih. Publiku do të ketë mundësinë të shijojë një spektakël mbresëlënës të shoqëruar me efekte multimediale.

Pas rikthimit në Bullgari, grupin e pret një kalendar i ngjeshur aktivitetesh kushtuar 25-vjetorit të albumit “Rrugë të Panjohura” dhe këngës me të njëjtin titull. Që në fillim të korrikut do të organizohet një koncert ekskluziv vetëm me kitarë dhe vokal në plazhin e Burgasit, pikërisht në vendin ku u krijua teksti i kësaj kënge të njohur. Më pas do të vijojnë një koncert në ishullin “Shën Anastasia” gjatë muajit gusht, si dhe koncerti tradicional “Po ikën vera, po vjen vjeshta” në shtator. Në këto koncerte, Meri Bojs Bend takohet me një publik ku disa breza këndojnë së bashku, me një zë, “Rrugë të Panjohura”.

““Rrugë të Panjohura” është një këngë shumë e rëndësishme për ne dhe shumë e dashur për njerëzit brez pas brezi. Tani u bindëm edhe në Vjenë se publiku e di këngën nga fillimi gjer në fund – të gjithë tekstin! Ndjenja kur këndon një këngë a capella bashkë me një sallë të mbushur plot është e papërshkrueshme. Është diçka e jashtëzakonshme dhe ende jam nën ndikimin e atij emocioni.”

E pyetur se ku e çojnë këto “rrugë të panjohura” gjatë çerek shekullit të fundit, Maria Mutafçieva, autore e muzikës dhe tekstit të këngës, u përgjigj:

“Jeta rrjedh në atë mënyrë që nuk jam kurrë plotësisht e sigurt nëse jam në rrugën e duhur. Por gjithmonë vjen një takim i ri me njerëzit, një koncert i ri – nis të këndoj, publiku më përgjigjet, këndon bashkë me mua, dhe kjo është shenja se jam në rrugën e duhur. Unë jam një njeri që vazhdon të ecë përpara – herë me guxim, herë me hezitim, ndonjëherë duke u hedhur me kokë në aventura. Jam një njeri që e do botën dhe dëshiron ta njohë atë. E ruaj këtë kureshtje ndaj saj, më pëlqen të ec nëpër rrugë të panjohura, të admiroj njerëzit që takoj përgjatë tyre dhe vendet e bukura që vizitoj. Bota është vërtet e mrekullueshme. Shumë e bukur! Dhe jam jashtëzakonisht mirënjohëse që këto rrugë të panjohura më çojnë drejt miqësive të reja, kudo në botë.”

Lexoni më shumë:

• Maria Mutafçieva-Meri: Dhurata më e çmuar janë ditët e lumtura me njerëzit tanë më të afërt

• "Përshëndetje" - diçka e re nga Mary Boys Band

• Për “Mary Boys Band” vera zgjat deri më 25 tetor me "Peizazh me ngjyra"

Përgatiti në shqip: Svetllana Dimitrova