Katër medalje për nxënësit bullgarë në Olimpiadën Ballkanike të Fizikës

Nxënësit bullgarë fituan katër medalje në edicionin e tetë të Olimpiadës Ballkanike të Fizikës, që u mbajt në Stamboll. Ekipi u kthye me një medalje ari, një argjendi dhe dy bronzi, duke konfirmuar edhe një herë nivelin e lartë të përgatitjes së të rinjve bullgarë në këtë fushë.

Medaljen e artë e fitoi Mirosllav Draganov nga Gjimnazi i Shkencave të Natyrës dhe Matematikës “Akad. Nikolla Obreshkov” në Burgas. Me medalje argjendi u vlerësua Nikolla Kostov nga Gjimnazi Matematikor i Sofjes, ndërsa medaljet e bronzit i fituan Boris Pulev nga Gjimnazi Kombëtar i Shkencave të Natyrës dhe Matematikës dhe Kirill Momçillov nga Gjimnazi Matematikor i Sofjes.

Ministria bullgare e Arsimit dhe e Shkencës theksoi se ky sukses është rezultat i punës së palodhur të nxënësve dhe përkushtimit të mësuesve të tyre.

Olimpiada Ballkanike e Fizikës është një nga garat e pakta ndërkombëtare të fizikës për nxënës nën moshën 17 vjeç. Ajo synon të nxisë interesin për shkencën, të mbështesë zhvillimin e talenteve të reja dhe të forcojë bashkëpunimin mes vendeve të rajonit.

Redaktoi: Diana Cankova

Përgatiti në shqip: Svetllana Dimitrova