Ministrat bullgarë prezantuan në Bruksel projekte për ndërlidhshmëri

Ministrja e Punëve të Jashtme, Velisllava Petrova, dhe Ministri i Transportit dhe Komunikimeve, Georgi Peev, u takuan më 22 korrik në Bruksel me komisioneren evropiane për Zgjerimin, Marta Kos, si edhe me anëtarë të kabinetit të presidentes së Komisionit Evropian, njoftoi Ministria e Punëve të Jashtme e Bullgarisë.

Gjatë takimit u diskutua përmirësimi i ndërlidhshmërisë midis BE-së, Ballkanit, Ukrainës, Moldavisë, Kaukazit dhe Lindjes së Mesme. Dy ministrat prezantuan vizionin e Sofjes për zhvillimin e lidhjeve të transportit, energjisë dhe atyre digjitale. Ata theksuan rëndësinë e zgjerimit të projekteve ekzistuese dhe të zbatimit të nismave të reja me interes të përbashkët evropian.

Në takim u shqyrtuan edhe mundësitë e financimit të këtyre projekteve, përfshirë përmes mekanizmave të partneritetit publik-privat, si dhe nëpërmjet instrumenteve financiare të Bashkimit Evropian.

 

Redaktoi: Ivo Ivanov

Përgatiti në shqip: Vesella Mançeva