Për të dytin muaj radhazi bie besimi ndaj qeverisë së “Bullgarisë Progresive”

Nëse zgjedhjet do të mbaheshin sot, partia “Bullgaria Progresive” do të mbetej forca e parë politike me 39% besim. Këtë e tregon një sondazh përfaqësues i zhvilluar nga agjencia “Market Links” në periudhën 11–19 korrik.

Forca e dytë politike është tashmë koalicioni i shpërbërë i “Po e Vazhdojmë Ndryshimin” dhe “Bullgaria Demokratike”, me 14,4% mbështetje. Të tretët renditen GERB-SDS me 12,7%. DPS gëzon mbështetje prej 4,2%, ndërsa “Vëzrazhdane” arrin 3,6%.

Besimi ndaj kabinetit të Kryeministrit Rumen Radev ka rënë me 8% që nga marrja e detyrës në muajin maj. Rënia e besimit shënohet për të dytin muaj radhazi. Gjithashtu është ulur edhe vlerësimi personal i Kryeministrit Rumen Radev, deklaroi për bTV sociologu i agjencisë “Market LINKS”, Dobromir Zhivkov.

Në korrik, 42% e të anketuarve kanë deklaruar besim ndaj qeverisë, kundrejt 35% që kanë shprehur mosbesim. Në maj, niveli i besimit ishte matur në 50%

 

Redaktoi: Ivo Ivanov

Përgatiti në shqip: Vesella Mançeva