DANS renditi rreziqet me të cilat përballet vendi

Në raportin e saj vjetor, Agjencia Shtetërore për Sigurinë Kombëtare (DANS) përshkruan rreziqet me të cilat përballet Bullgaria.  

Në vend të parë, shërbimi rendit situatën e ndërlikuar gjeopolitike, konfliktet, kërcënimet hibride dhe fatkeqësitë natyrore gjithnjë e më të shpeshta si pasojë e ndryshimeve klimatike.  

Sipas DANS-it, mbetet i lartë rreziku i sabotimeve dhe sulmeve kibernetike ndaj objekteve të infrastrukturës kritike në fushat e administratës shtetërore, energjisë, transportit dhe komunikimeve, si nga shtete me qëllime keqdashëse, ashtu edhe nga subjekte joshtetërore, përfshirë organizata kriminale, ekstremiste ose terroriste.

Aktiviteti i shërbimeve të huaja të inteligjencës në vend mbetet “vazhdimisht i lartë”, thuhet në analizën e paraqitur në Parlament. DANS ka dhënë qëndrim negativ për dhënien e shtetësisë bullgare për 25 shtetas të huaj gjatë vitit 2025 për shkak të veprimtarive që cenojnë sigurinë kombëtare.

Redaktoi: Ivo Ivanov

Përgatiti në shqip: Vesella Mançeva