Ekspozita "Rasti Petër Daçev" rizbulon një mjeshtër të harruar bullgar

Deri në fund të muajit gusht, në Galerinë e Artit të Qytetit të Sofjes mund të vizitohet një ekspozitë që paraqet krijimtarinë mbresëlënëse të Petër Daçevit, një prej shumë artistëve të harruar në artin bullgar. Ekspozita "Rasti Petër Daçev", e organizuar me rastin e 130-vjetorit të lindjes së artistit, është pjesë e një projekti të galerisë që synon të rikthejë tablonë komplekse të artit bullgar ndërmjet dy luftërave botërore.

Ekspozita mbledh më shumë se 200 vepra dhe tregon se si është zhvilluar natyra krijuese e artistit në periudha të ndryshme të jetës së tij. Periudha e parë, simboliko-ekspresioniste, paraqitet përmes ekspozitës së tij personale të vitit 1924, e cila tërhoqi vëmendjen e bashkëkohësve të tij. Periudha e dytë përfshin vepra të krijuara gjatë qëndrimit pothuajse dhjetëvjeçar të artistit në Stamboll. Rrugë, porte, tregje, panorama arkitekturore dhe figura njerëzore ndërtojnë imazhin e një qyteti dinamik dhe shumëplanësh. Periudha e tretë tregon se si ndryshoi stili i Daçevit gjatë kohës së socializmit, nën ndikimin e realizmit socialist.

"Rasti Petër Daçev" ofron një këndvështrim të ri mbi një autor, krijimtaria e të cilit vazhdon të ngrejë pyetje mbi kufijtë e modernizmit bullgar dhe mbi rrugët kulturore të artistëve tanë.

Redaktoi: Miglena Ivanova

Përgatiti në shqip: Vesella Mançeva