Qarkullim i rënduar i automjeteve në pikën kufitare “Kapitan Andreevo”

Trafiku është i dendur në pikën kufitare “Kallotina” me Serbinë në hyrje për automjetet e lehta, si edhe në pikën “Kapitan Andreevo” në hyrje dhe dalje për automjetet e lehta dhe mjetet e rënda nga dhe drejt Turqisë. Kalimi në pikat dhe vendkalimet kufitare me Greqinë, Maqedoninë e Veriut dhe Rumaninë po zhvillohet normalisht për këtë periudhë të vitit, njoftojnë nga Policia Kufitare. Për shkak të nivelit të ulët të ujit në Danub, i vetmi traget që vazhdon të operojë mes Bullgarisë dhe Rumanisë është ai ndërmjet qyteteve Silistra dhe Călărași. 

Për shkak të temperaturave të larta të pritshme, në periudhën nga 4 deri më 6 gusht, nga ora 13:00 deri në 21:00, policia do të ndalojë qarkullimin e mjeteve të rënda mbi 20 ton në rrugën Vidin-Vraca, si edhe në autostradat “Trakia”, “Marica”, “Hemus”, “Struma” dhe “Evropa”. 

Gjatë tri netëve radhazi, nga 4 deri më 7 gusht, do të kryhen punime pastrimi në nyjën rrugore “Daskallovo” në autostradën “Struma”, pranë Pernikut. Punimet do të fillojnë në orën 21:00 të datës 4 gusht dhe do të zgjasin deri në orën 04:00. Lëvizja do të kufizohet në mënyrë të pjesshme dhe sipas fazave në korsitë e brendshme dhe të jashtme, si edhe në degëzimet lidhëse të nyjës rrugore.

 

Redaktoi: Ivo Ivanov

Përgatiti në shqip: Vesella Mançeva