Zëvendësambasadori i Izraelit bëri një vizitë jozyrtare në qytetin e Banskos

Kryetari i Bashkisë së Banskos, Stojço Banenski, zhvilloi një takim joformal me zëvendësambasadorin e Izraelit në Bullgari, Tadian Poplinger. Ai është ndër diplomatët që tregojnë interes të vazhdueshëm për zhvillimin e Banskos dhe e ka vizituar qytetin disa herë. Biseda u përqendrua në mundësitë për thellimin e kontakteve dypalëshe në fushat e turizmit, kulturës dhe sportit. 

U theksua se gjatë viteve të fundit gjithnjë e më shumë qytetarë izraelitë zgjedhin Banskon jo vetëm si destinacion turistik gjatë gjithë vitit, por edhe si vend për qëndrim afatgjatë. Qytetarët izraelitë janë ndër pjesëmarrësit më aktivë në tregun lokal të pasurive të paluajtshme, ndërsa shumë prej tyre tashmë janë bërë pjesë e komunitetit të Banskos, duke u përfshirë aktivisht në jetën shoqërore, kulturore dhe ekonomike të qytetit.

Gjithashtu u vu në dukje tradita e mirë që në programin e Festivalit Ndërkombëtar të Xhazit në Bansko të marrin pjesë artistë të shquar nga Izraeli. Edicioni i këtij viti gjithashtu përfshin projekte izraelite, mes tyre Amit Friedman Quartet dhe Big Vicious të Avishai Cohen, njofton Radio Bllagoevgrad.

Redaktoi: Ivo Ivanov

Përgatiti në shqip: Vesella Mançeva