Bullgaria dhe Turqia do të bashkëpunojnë kundër krimit të "gjeneratës së re"

Bullgaria dhe Turqia do të zgjerojnë veprimet e tyre të përbashkëta kundër krimit të organizuar ndërkufitar, trafikut të drogës dhe migracionit të paligjshëm, tha Ministri i Brendshëm turk Mustafa Çiftçi pas një takimi në Sofje me homologun e tij bullgar Ivan Demerxhiev, raporton BGNES. 

Çiftçi e përshkroi Bullgarinë si një vend fqinj, miqësor dhe aleat i NATO-s. Ndër temat kryesore të bisedimeve ishin krimi ndërkufitar dhe lufta kundër organizatave kriminale të "gjeneratës së re". Mysafiri paralajmëroi se disa nga këto struktura tashmë po marrin karakteristikat e organizatave terroriste. 

Nga pala bullgare, Çiftçit iu paraqit problemi i kapitaleve të konsiderueshme të gjeneruara nga krime korruptive, të cilat janë transferuar nga Bullgaria në Turqi dhe në vende të tjera. "Kam marrë garanci se pala turke do të bashkëpunojë në luftën tonë kundër këtyre dukurive. Ajo do të na ndihmojë gjithashtu për identifikimin e kësaj pasurie dhe kthimin e saj në Bullgari", deklaroi Demerxhiev pas takimit. 

Ministri bullgar i Punëve të Brendshme theksoi se prioritetet e përbashkëta për të dyja vendet mbeten lufta kundër krimit ndërkufitar, migracionit të paligjshëm, trafikimit të qenieve njerëzore, si dhe kundër shpërndarjes së narkotikëve. Janë përcaktuar masa për optimizimin e menaxhimit të kufirit. Demerxhiev vuri në dukje se bëhet fjalë për kufirin më të madh tokësor të Bashkimit Evropian. "Ai duhet të jetë njëkohësisht i sigurt, por edhe një urë dhe jo një barrierë mes dy popujve", tha ministri bullgar, cituar nga shërbimi për shtyp i Ministrisë së Punëve të Brendshme të Bullgarisë. 

Ministri turk raportoi se bashkëpunimi në kuadër të mekanizmit trepalësh midis Turqisë, Bullgarisë dhe Greqisë është i suksesshëm. Sipas tij, si rezultat i masave të përbashkëta të ndërmarra, migracioni i paligjshëm në rajon është ulur me 97% dhe rruga e migrantëve është devijuar.

Redaktoi: Ivo Ivanov,  Miglena Ivanova

Përgatiti në shqip: Vesella Mançeva