Kërkohet krijimi i një klase zero për nxënësit që nuk zotërojnë gjuhën bullgare

Deri në fund të vitit 2027 duhet të krijohet një klasë zero për nxënësit që nuk e zotërojnë gjuhën bullgare. Këtë e deklaroi për BNT zëvendëskryeministri Ivo Hristov. “Rezulton se rreth 40% e fëmijëve që aktualisht nisin klasën e parë nuk e zotërojnë mirë gjuhën bullgare, gjë që vështirëson të gjithë procesin e tyre të mëtejshëm arsimor”, komentoi Hristov.

Ministria e Arsimit propozon krijimin e një sistemi të unifikuar kombëtar për vlerësimin dhe ndjekjen e zhvillimit të fëmijëve në arsimin parashkollor. Propozimi është pjesë e projektit për përditësimin e Rregullores për Arsimin Parashkollor, i cili është publikuar për diskutim publik, raportoi BTA. Qëllimi është që vështirësitë në zhvillimin e gjuhës të zbulohen dhe të ndiqen që në kopsht, si dhe të ketë informacion objektiv për gatishmërinë e fëmijëve për shkollë para se të fillojnë klasën e parë.

Redaktoi: Ivo Ivanov

Përgatiti në shqip: Svetllana Dimitrova