Këngët e Ljubka Rondovës do të tingëllojnë në katër qytete bregdetare bullgare

Një seri koncertesh kushtuar këngëtares së madhe bullgare të muzikës popullore, LjubkaRondova, do të zhvillohen përgjatë bregdetit jugor të Detit të Zi me rastin e 90-vjetorit të lindjes së saj. Organizator është Qendra Bullgare e Artit dhe Folklorit “Nestia”, e cila ka bashkëpunuar për vite me Rondovën dhe ka organizuar koncertet e saj në Bullgari dhe jashtë vendit.

Rondova lindi në vitin 1936 në fshatin Shestevo, në Maqedoninë e Egjeut, Greqi. Ajo ishte një nga mijëra fëmijët që u shpëtuan përmes emigrimit gjatë Luftës Civile në Greqi, në vitin 1948. Në vitet 60-të të shekullit të XX-të, familja e saj u vendos në Bullgari. Ajo ka qenë soliste e Ansamblit “Goce Dellçev” në Sofje. Ka realizuar qindra regjistrime për Radion Kombëtare Bullgare dhe Televizionin Kombëtar Bullgar, si dhe disa albume solo. U nda nga jeta në vitin 2016 në Sofje.

Koncerti i parë do të mbahet më 21 gusht 2026, para godinës së bashkisë në Sveti Vllas. Më 22 gusht do të vijojë koncerti në skenën e hapur “Artium” në Nesebër, ndërsa më 23 gusht në sheshin qendror të Pomories. Koncerti përmbyllës do të mbahet më 24 gusht në skenën e parkut në Ahelloj, pikërisht në ditën kur mbushen 90 vjet nga lindja e këngëtares.

Të gjitha koncertet do të fillojnë në orën 19:00. Në program do të marrin pjesë këngëtarë, muzikantë dhe ansamble vallëzimi nga Bullgaria dhe vende të tjera.

Redaktoi: Miglena Ivanova

Përgatiti në shqip: Svetllana Dimitrova